Mukanda wa kasaka ka Bakunkushi-bakulu

Mukwetu mufule Yehowa:

Yesu bambile shi: “Anukeuku bya binyibinyi, na bya binyibinyi abinwikasha balungantu.” (Yowano 8:32, Kilombeno kipya) Bino bishima abitunyingisha ku mashimba byabya! Eyendo, we mukumbeene kuuka bya binyibinyi, sunga twekala mu ano “mafuku a nfudiilo” muwule myanda ya madimi. (2 Timotee 3:1) Otentekyesha efuku dibopushishe bya binyibinyi bwa mususa wa kumpala bu bya bebilesha Mwiyi dy’Efile Mukulu su? Boodi mupushe muloo wi kashaa!

Byabya, bu bi kupeta kiukilo kya bya binyibinyi kwi na muulo na kulungula bangi byanka efuku dyooso, abitungu twikale na mwikeelo wipushene na bya binyibinyi. Bwa kwibikita, abitungu twilame mu kifulo ky’Efile Mukulu. Kwilama mu kifulo ky’Efile Mukulu akulesha kinyi? Bishima bibakwile Yesu bufuku bwa muladilo wa lufu lwaye abyalula ku luno lukonko. Balungwile batumibwa baaye basha kululama shi: “Anwe balame mayi ande, anwikala mu kifulo kyande, bu byandi mu kifulo kya Nshaami, pakulama mayi aaye.”​—Yowano 15:10.

Shinguula shi Yesu belamine mu kifulo ky’Efile Mukulu pabaadi mulame mayi a Nshaaye. Natwe naamu twibalombeene kwibikita. Bwa kwilama mu kifulo ky’Efile Mukulu, abitungu twikale atulondo bya binyibinyi efuku dyooso. Yesu bakwile dingi mu bwabwa bufuku shi: “Binobino nubapu kushinguula byabya, anukekala na muloo su nubebikitshi.”​—Yowano 13:17.

Atukulupila n’eshimba dimune shi uno mukanda aukyebe nkukwasha bwa kutumikila bya binyibinyi na kwilama mu “kifulo ky’Efile Mukulu . . . bwa muwa wa looso.”​—Yuude 21, Kilombeno kipya 2009.