Kwi efuku ditobopushishe bushiye na bu’be e bupenka su?

Tala ka nsongwalume ke mu kifwatulo. Kakwete kutala ke bupenka na akapusha moo, ta mbyobyo su? Tobwepushiishe namu mu uno mushindo?— Bangi bantu mbepushe namu anka byabya ingi nsaa. Bible akula pabitale bakuuku ba Yehowa abaadi bepushe bu abo be bupenka na abapusha moo. Umune a kwabadi, nyi Eliya. Tubande kutaluula mwanda waye.

Eliya baadi mushaale mu Isaleele mafuku ebungi, kumpala kwa Yesu kutandjikwa. Akabe, nfumu a beena Isaleele, tabaadi alangwila Yehowa Efile Mukulu a binyibinyi nya. Akabe na mukashi aaye, Yezabele, abaadi abalangwila efile a madimi Baale. Byabya beena Isaleele bebungi nkubanga kulangwila Baale. Nfumu mukashi Yezabele baadi bubi bukile na baadi akumiina kwipaa muntu ooso baadi alangwila Yehowa, mpa na Eliya! Ouku kibakitshine Eliya?—

Eliya nkusuuka! Aye nkwenda mu kabaaka na nkafwama mu lubwebwe. Mu koobe kumona, bwakinyi baadi mukite byabya?— Oolo, baadi na moo. Kadi Eliya tabaadi mulombeene kutshina nya. Bwakinyi? Mwanda baadi auku shi Yehowa mmulombeene kumukwasha. Yehowa baadi muleeshe Eliya bukome bwaye kumpala. Byabya, Yehowa nkwalula ku luteko lwa Eliya nsaa ibatumine kaalo akatuukila mwiyilu. Oolo, Yehowa akyebe kukwasha Eliya binobino!

Nsaa ibaadi Eliya mu lubwebwe, Yehowa nkwisamba naye na nkumwipusha shi: ‘Nkinyi kyokitshi mwamwa?’ Eliya nkumwalula shi: ‘Nashaala nka pend’ami umune kwete nkulangwila. Ne nka bupenka, na nkwete kutshina tala banyipa.’ Eliya baadi anangusheena shi bafubi booso ba Yehowa mbapwe kwibayipa. Kadi Yehowa nkumulungula shi: ‘Nya, ta mbya binyibinyi nya. Kukii bantu bakile pa 7000 bashaale abandangwila. Nyinga eshimba. Ne na mufubo ukata wankupa bwashi okite!’ Omono shi Eliya baadi musangale paaye kupusha uno mwanda?—

Uno mwanda wa Eliya ngulombeene nkulongyesha kinyi— Tokumanga kupusha bushiye sunga kwipusha bu’be e bupenka. We na bakuuku bafule Yehowa na bakufule. Na dingi, Yehowa e na bukome bukile, na akumiina nkukwasha mu mishindo yooso! We na muloo wa kuuka shi twe bupenka su?—