Mwana Badi Mulayibwe

Yoosefe na Maadiya abaashalele ku Beteleme pamutwe pa kwalukila ku Nazarete. Pabadi Yesu mulombashe mafuku mwanda, abamusadile, muyile Mwiya w’Efile Mukulu kwi beena Isaleele. (Beena-Levi 12:2, 3) Bibadi abitungu dingi kuudika mwana nka mu dyady’efuku. Abo nkuudika mwana bu Yesu muyiile bibadi mwikeyilu Gabryele mwibalungule.

Mweshi ushima ubaapu kukila, Yesu balombasha mafuku 40. Baledi baaye abamutwadile kunyi? Abamutwadile ku ntempelo mu Yelusaleme, kubadi pabwipi na mbalo ibaabadi bashaleele. Mwiya ubadi autekye shi kunyima kwa mafuku 40 na mwana kutandjikwa, nyin’aye badi na kya kutusha mulambula wa kutoshiibwa ku ntempelo.—Beena-Levi 12:4-8.

Maadiya bakitshine byabya. Badi mutushe mulambu wa toonyi tubidi tupeela. Bino abitulesha shi Yoosefe na Maadiya tababadi na bupeta bwibungi nya. Muyile Mwiya, abadi na kya kutusha mulambu wa mwana a mukooko na toonyi. Kadi su nyina mwana te na mushindo wa kulambula mwana a mukooko, badi na kya kutusha tukutshikutshi tubidi sunga tunkudimba tubidi. Nyi bwakinyi Maadiya balambwile toonyi tubidi tupeela.

Pababafikile ku ntempelo, ungi yaaya mununu badi mwifubwile kwi Yoosefe na Maadiya. Eshina dyaye nyi Simeone. Efile Mukulu bamulungwile shi kumpala kwadya kufwa, badi na kya kumona kukumbana kwa mulayilo wa Yehowa bwa Kidishitu sunga Mesiya. Kikudi kiselele kibadi kikunkushe Simeone mu dino efuku ku ntempelo kubakasangene Yoosefe na Maadiya na mwan’abo tooka. Simeone nkusemuna mwana mu maboko aaye.

Nsaa ibadi kii musemune Yesu, Simeone batumbwile Efile Mukulu aakula shi: “Binobino Mwanaana tadiila mufubi oobe eende mu butaale, bu biboodi mwambe, mwanda meeso ande abamono kipandjilo kyobe, kiboodi mulumbuule bwa miilo yooso, nyi etaata dya kufumbwila baa-miilo binyibinyi, na ntumbo ya Isaleele mwilo oobe.”—Luka 2:29-32.

Yoosefe na Maadiya abakanyine pa kupusha bino. Simeone nkwibasampa pa kulungula Maadiya shi: “Mwana uno e kwanka bwa kubuuka na kupona kwa bantu bebungi mu Isaleele” n’ashi malwa e bu mwele wi na maashi kubidi aakamufikila.—Luka 2:34.

Kubadi ungi muntu badi panka mu dyadya efuku. Badi mutemuki mukashi Aana badi na bipwa 84. Aa mafuku, tabadi akisha bisangilo ku ntempelo nya. Mu yaaya nsaa, bafikile kwi Yoosefe na Maadiya na mwana Yesu. Aana babangile kutumbula Efile Mukulu na kwakula pabitale Yesu kwi booso abadi abateemesha.

We kumona bibadi Yoosefe na Maadiya na muloo apakitshika yaaya myanda ku ntempelo! Kushii mpaka ino myand yooso ibadi ayibashinkamisha shi mwana aabo badi Mulayibwe a Efile Mukulu.