Mukanda wa kasaka ka Bakunkushi-Bakulu

Kwi bakwetu balungudi ba mukandu wibuwa:

Twi na muloo ukata wa kwikala na kineemo kya kwibunga bwa kulangwila Efile Mukulu a binyibinyi Yehowa! Twi “bafubi pamune” naaye, be na mudimo wiselele aupa bantu muwa, kukita bulungudi na kulongyesha mukandu wibuwa wa Bufumu bwaye butudibwe. (1 Kod. 3:9; Mat. 28:19, 20) Bwa kulombasha uno mudimo mu nsenga ishima mu kufukama na mu buumune, abitungu twikale belumbuule kalolo.​—1 Kod. 14:40.

Uno mukanda aukyebe kwinukwasha bwa’shi nuukye mushindo autambukaa kakongye ka bena Kidishitu lelo uno. Aulesha kineemo na bushito bwanudi nabo bu byanudi ba Temwe ba Yehowa. Su anwata kineemo kyanudi nakyo na muulo na kulombasha mudimo wenu, anukyebe “kunyinga mu lukumiino.”​—Bik. 16:4, 5; Nga. 6:5.

Atwinunyingisha bwa’shi nulongye uno mukanda kalolo. Talayi mushindo wanudi balombene kutumikila myanda i mwanka mu muwa wenu. Kileshesho, su kubaapu kukila mafuku apeela kasha wekala mulungudi sh’abandile kubatshishibwa, mmatabula kinyi aatungu’shi wele bwa kubatshishibwa bu Temwe a Yehowa? Ku lungi lupese, su we mupwe kubatshishibwa, nkinyi akitungu’shi okite bwa kukula mu kikudi, na kutamisha mudimo okwete kufubila Yehowa? (1 Tim. 4:15) Mushindo kinyi oodi mulombene kukwasha bwa’shi kufukama kwikale mu kakongye? (2 Kod. 13:11) Kimba myaluulo ku ino nkonko mu uno mukanda.

Su we mulume mupwe kubatshishibwa, nkinyi kyodi mulombene kukita bwa kulombasha myanda itekibwe bwa kwikala mufubi a midimo na, kunyima bwa kwikala mukulu mu kakongye? Bu bi binunu bya bantu bikwete kutwela mu ndumbulwilo a Efile Mukulu, kwi lukalo lukata lwa bakwetu balume banyingye bwa kukunkusha. Uno mukanda aukyebe nkukwasha bwa’shi oukye akilesha “kukimba” bya kulombasha ino mpángo.​—1 Tim. 3:1.

Atutekye ngofu bwa’shi uno mukanda winukwashe numone mbalo yanudi nayo mu ndumbulwilo a Yehowa na kwiyisangeela. Twi benufule booso ngofu na atutungunuka na kukulupila’shi anwikala munkatshi mwa baaba abekala na muloo wa kulangwila Yehowa Nshetu e mwiyilu.​—Mis. 37:10, 11; Yesh. 65:21-25.