Efile Mukulu bapanga eyilu na nsenga

Yehowa Efile Mukulu nyi Muitupangie. Bapangile bintu bioso, abimueka na bish’abimueka. Kumpala kua kupanga bintu abimueneka, bapangile ba mikeyilu bakile bungi. Ouku shi ba miikeyilu mbantu kinyi? Ba mikeyilu nyi mbantu babaabadi bapangie kui Yehowa bamuifane. Anka bu biatushi balombeene kumona Efile Mukulu, abo namu’nyi, t’abamuekaa nya. Muikeyilu a kumpala abapangile bafikile mukuashi aaye. Yawa muikeyilu bakuashishe Yehowa pabaadi apanga nyenyenye, ma planete na bingi bintu bioso. Umune a ku aa ma planete nyi nsenga, mbalo ibuwa yatudi bashaale.

Akupu, Yehowa balumbuluile nsenga bua’shi nyema na bantu bemushale. Bapangile nguba bua kumunyika nsenga. Apanga miengie, meema a tulunga na mieela.

Nkinyi kibaadi kikitshikie kunyima? Yehowa bambile’shi: ‘Nsenga imeneshe lubishi na mitshi.’ Mitshi ibungi ilekeene ayituusha bikuba, midioko na bilongo bibungi nkubanga kumena. Akupu, Yehowa nkupanga bipangua bilekeene, abipapama, bia mu mema, abiikaka na abisoboka. Bapangile kubanga ku tupeela bu tupuku, na ku bikata bu ngiefu. Nyema kinyi oodi mufule?

Akupu Yehowa balunguile muikeyilu a kumpala’shi: “Tukite muntu.” Bantu be na kia kuikala belekeene na nyema. Abitungu beekale abaakula, abasepe na kuela nteko. Be na kia kulama nsenga na nyema. Ouku baadi muntu a kumpala su? Tubande kutala.