Efile Mukulu mmwate mpàngo ya kupaasha bantu

Efile Mukulu balungwile Abrahame muntu sha kululama shi, ‘keekulu’ kabaabadi batemukye akakyebe kutuukila munkatshi mwa baana baaye. Ku bukwashi bwa kaaka keekulu, bantu ba “bisamba byooso” abakyebe kupeta myabi. (Kibangilo 22:18) Yaakobo mwikulu a Abrahame bayiile mu kushaala mu Ejiipitu, mwamwa, kifuko kyaaye kibatamine akyo nkufika mwilo wa Isaleele a kala.

Kunyima, Faraone nfumu sh’etombo a mu Ejiipitu batuudile beena Isaleele ku bupika mpa na nsaa ibaadi Efile Mukulu mutuushe mutemuki Moyiise, baadi mukunkushe mwilo bwa kutuuka mu dyadya eumbo pabaadi mukite kipaso aye nkwimika meema a Kalunga Kamonga. Kunyima kwa byabya, Efile Mukulu bapeele Isaleele miiya, mpa na Mayi Ekumi, bwa kwibakunkusha na kwibakalwila. Yaaya miiya ibaadi ayileesha mushindo wa kutuusha milambu ya kushimisha nayo milwisho. Ku bukwashi bwa kikudi ky’Efile Mukulu, Moyiise balungwile beena Isaleele shi Efile Mukulu akyebe nkebatumina ungi mutemuki. Yawa mutemuki ndjo baadi mulombeene kwikala bu ‘keekulu’ kabaabadi balee.

Kunyima kwa bipwa bikile pa 400, Efile Mukulu balayile Nfumu Daavide kufika kwa ‘keekulu’ kabaabadi batemukye mu Edene, kabaadi kalombeene kukunkusha bufumu abukekala kwanka losoo. Kaaka keekulu nyi Meesiya, aye Mupaashi abaabadi basangule kwi Efile Mukulu bwa kupaasha bantu na kwalusha Mpaladiiso pa nsenga.

Ku bukwashi bwa Daavide na bangi batemuki, Efile Mukulu baadi ende na kufumbula myanda ibungi pabitale Meesiya. Abaadi batemukye shi akyebe kwikala muntu sha kwiyisha na kalolo mu bufumu bwaye, nsala, kukutwa kwa kululama na ngoshi abikapu. Bantu booso abekala mu kufukama munkatshi mwabo mpa na nyema. Mikumbo, makyenga na lufu—bintu bishibaadi mu mpàngo ya kumpala y’Efile Mukulu—abikashimina, na bafwe abakekala dingi na muwa pa nsenga.

Ku bukwashi bwa mutemuki Mika, Efile Mukulu baadi mutemukye shi Meesiya akatandikila mu Beeteleme na ku bukwashi bwa mutemuki Danyele batemukile shi akayipayibwa. Anka Efile Mukulu baadi mulombeene kusangusha Meesiya ku lufu na kumutuula bu Nfumu mwiyilu. Danyele bamwene dingi mu kilotwa bwa mususa wa kumpala Bufumu bwa Meesiya abo abukapyana ma guvernema angi ooso. Meesiya bafikile muyiile bibaabadi batemukye su?

—Ngwatshiibwe mu mukanda wa Kibangilo shapitre 22-50, na mu Efilu, Miiya Ikituulwe, 2 Samwele, Misambo, Yeeshaya, Danyele, Mika, Zakarii 9:9.