MIISAMBO YA MBANGILO | KWELA NTEKO KWI NA MUULO SU?
Kwi muntu apushaa nteko su?
Bangi bantu abamona’shi kwela nteko nkukisha kwa nsaa mwanda ta kwi muntu mulombeene kwibapusha. Bangi bakwete kuteka kadi abamono’shi tabakwete kupeta myaluulo. Ungi muntu apelaa’shi Efile Mukulu te kwanka, baatushile binangu byaye bya kupwandjikisha pabatekele Efile Mukulu’shi: “Nsongye namu sunga ku matwi kapeela.” Kadi akula’shi Efile Mukulu bashadile’nka “muumiine kushi kwakula.”
Kadi Bible etushinkamisha’shi kwi Efile Mukulu kwete kupusha nteko. Mu Bible mwi ano mayi ababalungwile ungi mwilo wa mafuku a kala: “Paanwele musaase, [Efile Mukulu] eenukitshiina kalolo. Eenwaluula ank’aye kyaapusha musaase wenu.” (Yeeshaya 30:19) Ungi verse a mu Bible akula’shi: “Asangeela nteko ya bantu balulame.”—Myeele 15:8.
Yesu baadi mutekye Nshaye, Nshaye namu “baapushiishe kuteka kwaye.”—Beena-Ebreeyi 5:7
Bible akula dingi bwa bileshesho bya bantu babaadi bakite nteko beyipusha kwi Efile Mukulu. Ungi verse akula’shi Yesu beelele “nteko . . . kwi Uno baadi mulombeene kumupaasha” na’shi “babaapushiishe kuteka kwaye.” (Beena-Ebreeyi 5:7) Twi balombeene kupeta bingi bileshesho mu mukanda wa Danyele 9:21 na mu 2 Myanda 7:1.
Byabya, bwakinyi bangi bantu abamono’shi nteko yaabo tabeyaluula? Bwa’shi Efile Mukulu apushe nteko yeetu, abitungu twikale atutekye nka penda Efile Mukulu a mu Bible, Yehowa,a kushii kuteka bangi b’efile sunga ba nkambwa. Efile Mukulu akumiina dingi’shi tumutekye “muyiile kukumiina kwaye”—kumuteka bintu byakumiina. Efile Mukulu etushinkamiisha’shi su tubamutekye mu wawa mushindo, “eetuteemesha.” (1 Yowano 5:14) Byabya, bwa’shi bateemeshe nteko yeetu, abitungu tuukye Efile Mukulu a mu Bible na kulonga kikyebe ky’eshimba dyaaye.
Bantu bebungi abakumiina’shi kwela nteko ta mpenda mwanda utale lulangwilo nya, kadi Efile Mukulu apushaa na kwaluula nteko. Isaac, a mu Kenya, akula’shi: “Naadi mutekye bukwashi bwa kupusha Bible. Kunyima kwa kapindji, muntu bafikile kwande aye nkunkwasha.” Hilda a mu Philippines, baadi na lukalo lwa kuleka kutoma nfwanka. Kunyima kwa kwitatshisha munda mwa mafuku ebungi kushii koobesha, mulume aaye bamwipwishe’shi: “Bwakinyi twe mutekye Efile Mukulu bwa’shi akukwashe?” Baadi mutumikile dino elango na kwakula’shi: “Naadi mukeme bikile mushindo ubaadi munkwashe. Naadi mubangye kushimisha malaka a kutoma nfwanka. Namwene mushindo wa kwimika kwiyitoma.”
Efile Mukulu mmulombeene nkukwasha bwa kulombasha myanda yoobe ipusheene na kikyebe ky’eshimba dyaaye su?
a Yehowa nyi eshina dy’Efile Mukulu bu byabadi bedileshe mu Bible.