Luno lukonko lwi na muulo

LELO uno, bantu be na mweneno mwilekene pabitale muwa na lufu. Bamo abamono’shi kunyima kwa lufu, abakatungunuka na kwikala na muwa mu ungi mushindo sunga mu ingi mbalo. Bangi abamono’shi abakatandjikwa dingi bu ungi muntu. Bangi namu abamono’shi lufu nyi nfudiilo a byooso.

We kwikala na oobe mweneno pabitale uno mwanda, muyiile byabadi bakukushe sunga muyiile bipikwa bya mbalo yodi mukudile. Bu byakudi binangu bilekenelekene pabitale uno mwanda, kwi muntu sunga mbalo yatudi balombene kukimba bwa kupeta ngalulo yatudi ya kukulupila na ya binyibinyi ku luno lukonko lwi na muulo su?

Munda mwa bipwa nkama na nkama, bakata ba bipwilo mbalongyeshe bantu dilongyesha dya’shi muntu e na anyima shi’afwiyaa. Bena bipwilo bebungi, bu—bya bwina Kidishitu, ba Hindu, bena Yuuda, ba Mizilma, na bingi bipwilo—abakumina’shi muntu e na anyima shi’afwiyaa, na’shi kunyima kwa mbidi ya muntu kufwa uno anyima atungunukaa na kwikala kwanka bu kikudi. Bena Bouddha namu abakumina’shi pa mwanda wa kutandjikwa misusa ibungi, bukome bwi mu muntu mbulombene kubanga nshalelo mupya a miloo ibungi abetanyina bu Nirvana.

Pa mwanda wa ano malongyesha akile bungi, bantu bebungi mu nsenga ishima mbafikye mu kukumina’shi lufu alwibashitwila kibelo kya kwikala na nshalelo a ungi mushindo. Ngi bwakinyi bantu bebungi abamba’shi lufu nyi etabula dya dikata mu muwa wa muntu, na abamono’shi lufu lubadi mu mpàngo y’Efile Mukulu. Bible namu akula kinyi pa uno mwanda? Atukutekye bwa’shi obadikye namu mwisambo aulondo. Lwalulo lokapete ndulombene nkukemesha.