Ba mwikeyilu​—Mbalombene kwikala na bukitshishi mu muwa oobe su?

DINGI efuku mu dya Mpooso kunyima kwa midi, Kenneth na Filomena, bashale mu Curaçao, abayile mu kutala mulume na mukashi bababadi abalongo nabo Bible.

Kenneth akula’shi, “Pabatufikile, tubasangene ku kibelo nkushite na tubamwene mifunda ya mootoka ubatuku. Anka eshimba dyande dibantumine bwa’shi ngitanyine nimero ya telefone ya mukashi.”

Pabayitabile mukashi, bebalungwile’shi mulume aaye bende ku mudimo. Anka, nsaa ibapushishe’shi Kenneth na Filomena be pasha, bashitwile ku kibelo ebetanyina bwabadya kutwela mu nshibo.

Mususa umune, abamwene’shi adilanga. Nsaa ibelele Kenneth luteko bwabadya kubanga kulonga, uno mwana mukashi babangile kudila dingi. Ngi bwakinyi Kenneth na Filomena ababangile kumwipusha mwanda ubadi aumukalakasha.

Uno mwana mukashi bebalungwile’shi, akyebanga kwiyipa yaya nsaa ya kunyima kwa midi, na ekalanga afundila mulum’aye mukanda bwa kumulungula bwakinyi beyipaa, anka nsaa ibamwitanyina Kenneth ku telefone ngi pabayimika kwiufunda. Bebalungwile’shi e na lukalakashi lwa twinyongoshi, ngi bwakinyi abadi bamuleshe mayi a mu Bible abadi amukankamikye. Ano mayi a kumunyingisha nao abadi apashe muwa waye.

Kenneth akula’shi, “Tubadi batumbule Yehowa ngofu pa’ye kwitukwasha bwatudya kupasha uno mwana mukashi e na twinyongoshi, bikishekishe pa’ye kwitutakula pangi ku bukwashi bwa mwikeyilu sunga bwa kikudi kyaye bwatudya kwitanyina ku telefone aaye!”a

Kenneth na Filomena be na kabingilo ka kukumina’shi Efile Mukulu ngi badi mwibakunkushe, ku bukwashi bwa mwikeyilu, bwa kikudi kyaye ki selele sunga bukome bukitshishi su? Su bino bibadi Kenneth mwitanyine bibadi bikitshikye mu mpukapuka?

Tatuuku nya. Anka twi bashinkamishe’shi Efile Mukulu atumaa ba mwikeyilu baye bwabadya kukwasha bantu mu myanda ya mu kikudi. Bu kileshesho, Bible akula’shi batumine mwikeyilu bwadya kukunkusha Fidipe badi mwina Kidishitu na mulungudi a mukandu wibuwa bwadya kwenda mu kukwasha mwina Etshopi badi akimbi bukwashi mu myanda ya mu kikudi.—Bikitshino 8:26-31.

Bantu ba mu bipwilo bibungi abakumina’shi kwi bipangwa bya mu kikudi, na abayitanyina bamo ba ku bino bipangwa bu mikyendji yabakwete kutuma kwi Efile Mukulu bwa kulombasha kikyebe ky’eshimba dyaye sunga kufuba bu balami ba bantu. Bantu bebungi abakumina’shi ba mwikeyilu be kwanka na’shi bino bipangwa bya mu kikudi bi na bukitshishi bwibuwa mu muwa wabo. Anka bangi bantu namu abapele’shi ba mwikeyilu ta be kwanka.

Ba mwikeyilu be kwanka binyibinyi su? Su be kwanka, mbatukile kunyi? Mmyanda kinyi ya binyibinyi itale ba mwikeyilu? Mbalombene kwikala na bukitshishi mu muwa oobe su? Tubandeyi kutaluula myanda ayitushinkamisha uno mwanda.