Kikitshino kya kalolo kya mwina kidishitu
MU LUPATA lupela mu Gujarat, mu Inde, nyi mubadi mubatshishibwe nshaye na John bu Temwe a Yehowa ku mbangilo kwa bipwa 1950. John na bakwabo balume na bakashi batano mpa na nyinabo abadi balamate mu kipwilo kya Katolike ka ku Looma na pa mwanda wa byabya, abadi bashikwe lukumino lwa nshabo.
Dingi efuku, nshaye na John bamulungwile bwashi akatule anvelope kwi kuku aye mu kakongye. Anka, kwakwa kunamashika, John badi mwitape ku munwe bibubi nsaa ibadi afungula kangi ka ntuku. Sunga mbyabya, bu bibadi na lukalo lwa kukokyela nshaye, banyine kilamba ku munwe aye nkwenda lwa ngwa mu kutula anvelope.
John pabakafikile kubabamutumine, mukashi ayawa ababamutumine, badi Temwe a Yehowa badi mutambule anvelope. Bamwene elonda di ku munwe wa John na akimba bya kumukwasha. Nkufungula kantu kaye kena bintu bya kumubuka nabyo, nkusuula elonda na bwanga aye nkwanya bande ku munwe. Akupu aye nkupa John ekopo dya tshyayi, ababangile kwisamba kalolo miisambo ya mu Bible.
Kubanga yaaya nsaa, binangu bibubi bibadi nabyo John kwi ba Temwe ba Yehowa bibabangile kukatuka, aye nkumwipusha myanda ibidi ayilesha kwilekena kwi pankatshi pa lukumino kwa nshaye na lwaye—su Yesu nyi Efile Mukulu na su abitungu bena Kidishitu basambile Madiya. Bu bibadi mulongye ludimi lwa Gujarati lwa John, yawa Temwe bamwalulwile ku bukwashi bwa Bible na aye nkumupa broshire a “Cette bonne nouvelle du Royaume.”
Kunyima pabadi abadika kakanda, John basangene shi, uno nyi mususa wa kumpala wapusha bya binyibinyi bya mu Bible. Bayile mu kumona mumpeele amwela yaya nkonko ibidi. Mumpeele nkwaluluka mususa umune nkumwasa Bible, nkumusamina shi: “Toodi Satana! Ndeshe mbalo yabadi bafunde mu Bible shi Yesu ta Efile Mukulu. Ndeshe mbalo yabadi bafunde shi twe mulombeene kusambila Madiya. Ndeshe!” Bibakitshine mumpeele bibatapile John kwishimba ngofu, aye nkumulungula shi: “Ntantulu dingi mikolo yande mu kipwilo kya Katolike nya.” Na tamwimwalukye dingi!
John babangile kulonga Bible na ba Temwe, nkulamata ku lulangwilo lwa binyibinyi, aye nkubanga kufubila Yehowa. Mu aa mafuku bebungi ba mu kifuko kyabo ababangile kulonga Bible. Lelo uno John e na mukofu ku munwe w’eyasa dyaye di balume ubadi mwitshibe takudi bipwa 60. Na muloo oso kwete kutentekyesha kikitshino kya kalolo kya mwina Kidishitu kibadi kimukakye mu nshalelo a lulangwilo lwa binyibinyi.—2 Kod. 6:4, 6.