Oukanga uno mwanda su?

Babadi abatumikila mayi a kulonda a mu Miiya ya Moyiise bwa kupudisha bilumbu bibadi abituuku mu Isaleele a kala su?

TWI kwamba’shi, oolo. Tubade kwata kileshesho kimune. Mukanda wa Miiya Ikituulwe 24:14, 15 awamba’shi: “Tofwambushanga mwina mufubo akyengye, mwikale mulanda, eekale umune a ku bakwenu sunga mwenyi anudi naye mwiumbo dyenu . . . Takwelelanga musaase kwi Yehowa: boobe mbilombene kwikala mulwisho.”

Mukanda wa muntu badi mutekye pa uno mwanda ubabadi bafunde mu siekele a musambo K.B.B. abadi beusangane pepi na eumbo dya Ashedode. Bi kwikala’shi abadi beufundile muntu sha efuba bakutshilwe kufuta muntu bungi bwa ntete butshibibwe, ano mayi ababadi bafunde ku kipese ky’elondo, aakula’shi: “Kunyima kwa mufubi oobe [winyi mukufunde] kupudisha kutuula byumbulwanga munda mwa mafuku apeela, Hoshayahu mwana a Shobay bafikile aata kilamba kya mufubi oobe. . . . Bantu boso babatudi atuumbula nabo mu kaanya ke bukopo abakatuulu bu kamonyi . . .’ shi bino byangakula mbya binyibinyi. Ami ntshi mulwishe mwanda su ngumune. . . . Su guvernere tamukukitshishe pa bukopo bodya kwalwisha mufubi oobe kilamba kyaye, mwalwishe kyanka bwa lusa! Tabitungu oshaala muumine aku namu mufubi oobe tapetele kilamba kyaye nya.”

Simon Schama muntu atalulaa myanda ya kala akula’shi luno luteko lwi bukopo “talwitulungula nka penda bwa muntu asendela muntu sha efuba bwadya kumwalwisha [kilamba kyaye nya], alwitulesha dingi’shi uno muntu atekye auku miiya ya mu Bible pabitale uno mwanda, bikishekishe miiya i mu Beena-Levi na mu Miiya Ikituulwe, ayipelesha kukyengyesha mulanda.”