Myaluulo ku Nkonko Yenu

◼ Kumpala kwa kubatshishibwa, abitungu shi muntu alungule mukandu wibuwa na kutwela mu bisangilo munda mwa mafuku bungi kinyi?

Kitshibilo kya kubatshibwa nyi nkitshibilo kikile buwa kilombeene muntu kwata. Anka kumpala kwashi muntu abatshibwe, abitungu ekale na mpushisho mukumbane a kyakya akimutekye Efile Mukulu. Kukasha mpushisho mukumbane, abitungu aleshe shi mwate kitshibilo kya kwikala na nshalelo mwipushene na miiya y’Efile Mukulu.

Beena Kidishitu mbebatekye bwashi tabasumbushenanga bisangilo byabo, byabya abitungu shi muntu shabandile kubatshibwa aleshe shi e na katshintshi ka kutwela mu bisangilo. (Eb. 10:24, 25) Abitungu ekale aluula mu bisangilo. Mulombeene mpa na dingi kwifundisha mu Kalasa ka mudimo wa teokrasi, sunga byekala shi tabitungu nka shi ekadikye mwifundishe nya.

Na dingi, bu bi beena Kidishitu mbebape mudimo wa kulungula mukandu wibuwa na kwikasha bantu bu balongi, abitungu shi mulungudi shi mubande kubatshishibwa ekale alungula mukandu wibuwa na katshintshi kumpala kwa kubatshibwa. (Mat. 24:14; 28:19, 20) Abitungu alungule mukandu wibuwa munda a myeshi bungi kinyi kumpala kwa kubatshibwa? Abitungu kumulekyela nsaa ibungi bwashi aleshe shi mwate kitshibilo kya kutungunuka na kulungula mukandu wibuwa na katshintshi ku mweshi na mweshi. (Mis. 78:37) Kadi tabitungu shi akishe mafuku akilekile bungi kumpala kwa kubatshibwa, pangi abitungu ndambo ya myeshi. Abitungu ekale atusha nsaa bungi kinyi mu rapore aaye? Takwi bungi kampanda bwa nsaa butekibwe nya. Abitungu shi bakulu batale myanda itale nshalelo a mulungudi ooso na kwikadika na nkatshinkatshi.—Luk 21:1-4.

Abitungu shi bakulu (sunga bafubi ba midimo mu tukongye twi bakulu bapela) abesamba na bantu abakyebe kubatshibwa baukye shi nshalelo a muntu ooso mmwilekene na a bangi, na abitungu bele binangu kalolo bwa kumona su muntu mmukumbane bwa kubatshishibwa. Abitungu bashinkamishe shi e na lukalo lwa kwikala Temwe a Yehowa na aleshe shi amonaa shi kwibunga pamune na ndumbulwilo a Yehowa na kulungula mukandu wibuwa nyi nkinemo kikata. Abitungu bakulu baukye shi tamubande kukula mu kikudi sunga kwikala na kyukilo bu kya balungudi bapwe kuubiila na mudimo nya. Su bakulu babamono shi muntu akyebe kubatshishibwa tamukumbane bwa kubatshishibwa, abitungu bamulungule na kanemo kooso bwakinyi muyiile abyamba Bifundwe abaata kyakya kitshibilo na kumukwasha bwashi anyingye mu kikudi.