Eyi dy’Efile Mukulu di na bukome
1. Kikongeno ky’efuku dimune kya kipwa kya mudimo 2014 akikala na mutwe wa mwanda kinyi?
1 Kushi bu bintu byooso abifiki kwi bantu bakutwe kupwidika, Bible e na bukome bwa kwitushintuula, bukome bwa kushintuula binangu byetu na mashinda etu bwashi ekale epushene na akikyebe Yehowa. Byabya mbukome kinyi bwi n’Eyi dy’Efile Mukulu? Mushindo kinyi watudi balombeene kutumikila bukome bwadyo mu nshalelo etu? Mushindo kinyi watudi balombeene kutumika nadyo bwa kukwasha bangi? Atukulupila shi atwe booso atukyebe kunyingishibwa mu kikudi pabakyebe kwisambila ino myanda ku kikongeno ky’efuku dimune bwa kipwa kya mudimo 2014. Mutwe wa mwanda wakyo awamba shi “Eyi dy’Efile Mukulu di na bukome,” watshibwe mu Beena-Ebreeyi 4:12.
2. Atupete myaluulo ya nkonko kinyi?
2 Myaluulo ya ino nkonko: Patwikala atulondo programe a kino kikongeno, tufunde myaluulo ya ino nkonko ayilondo.
• Bwakinyi abitungu tutuule lukulupilo Mwiyi dya Yehowa? (Mis. 29:4)
• Mushindo kinyi watudi balombeene kumona bukome bw’Eyi dy’Efile Mukulu mu muwa wetu? (Mis. 34:8)
• Mushindo kinyi oodi mulombeene kulesha bukome bw’Eyi dy’Efile Mukulu mu mudimo wa bulungudi? (2 Tim. 3:16, 17)
• Mushindo kinyi watudi balombeene kusuuka bwa kupela kudimbibwa na bintu bya pano? (1 Yo. 5:19)
• Bansongwalume na bansongwakashi mbakumbeene kukita kinyi bwa kukula mu kikudi? (Yel. 17:7)
• Mushindo kinyi watudi balombeene kwikala na bukome mpa na patudi babofule? (2 Kod. 12:10)
• Nkinyi kilombeene kwitukwasha bwatudya kwikala atushintuluka nsaa yooso, sunga pabitale biubishi na binangu bishinkame mwatudi? (Ef. 4:23)
3. Kukaasha kuteemesha programe a kikongeno, mushindo kinyi ungi ukumbeene kwitukwasha kino kikongeno ky’efuku dimune?
3 Kuteemesha ino myanda ya muulo akukyebe kwitukwasha ngofu! Na dingi, kikongeno ky’efuku dimune, anka bu kikongeno kya kifunda na kya distrike, akitupa mushindo wa kwiukena na bangi bakwetu balume na bakashi ba tungi tukongye. (Mis. 133:1-3; 2 Kod. 6:11-13) Byabya ata nsaa ya kwibunga na bakuuku ba kala, na kupeta bangi bakuuku. Su ku kikongeno ky’efuku dimune akufiki mukunkushi a distrike sunga mwina Betele bwa kukita mwisambo, bwakinyi twe mulombeene kukimba mushindo wa kumukukila aaye na mukashi aaye? Sunga naminyi, twi na kya kutengyela kino kikongeno akifiki na muloo ukata!