Tulonde kileshesho kya batemuki—Amose
1. Bwakinyi kileshesho kya Amose nkilombeene kwitunyingisha?
1 Tobwepushile bu’be shi mulombeene kobesha kulungula mukandu wibuwa mwanda twe mulongye tulasa twi bungi sunga mutandjikwe mu kifuko kya nkumo? Su mbyabya, we mulombeene kunyinga eshimba bu bibakitshine Amose. Baadi mulami a mikooko na kidime, kadi Yehowa baadi mumupe bukome bwa kulungula mukandu wibuwa. (Amose 1:1; 7:14, 15) Bi mumune, mu ano mafuku eetu, Yehowa atumika na baaba abamweneka bu bashi na muulo. (1 Kod. 1:27-29) Mmalongyesha angi kinyi atudi balombeene kupeta kwi mutemuki Amose mu mudimo wetu wa bulungudi?
2. Bwakinyi twi balombeene kushala banyingye kumpala kwa bulwishi?
2 Shala munyingye sunga kumpala kwa bulwishi: Amazia, tshite-mwakwidi a lulangwilo lwa kana ka ngombe mu bisamba ekumi bya beena Isaleele a kunundu, pabapushile Amose kwete kutemuka, baadi mwambe shi: ‘Aluka kwenu! Etutadiile! Twi na kyetu kipwilo!’ (Amose 7:12, 13) Amazia baadi mwaluule mayi a mutemuki bwa kumudimbiila kwi Nfumu Yeroboame bwashi ayimikye mudimo wa Amose. (Amose 7:7-11) Kadi Amose tabaadi mutshine nya. Lelo uno, bangi bakata ba bipwilo abakimbaa kwipushena na beena politike bwa kukyengyesha bafubi ba Yehowa. Sunga mbyabya, Yehowa etushinkamiisha shi kintu kyooso kya ngoshi kyabetutombwela takya kupeta ngobesha nya.—Yesh. 54:17.
3. Mukandu kinyi wi na myanda ibidi watukwete kulungula lelo uno?
3 Lungula kiimu kya Yehowa na myabi ya mu mafuku aafiki: Sunga byekala shi Amose baadi alungula kiimu ky’Efile Mukulu pabitale bisamba ekumi bya beena Isaleele a kunundu, baadi mufudiishe mukanda waye na mulayilo wa Yehowa wa kulumbuula myanda. (Amose 9:13-15) Atwe namu tukwete kulungula bantu pabitale kufika kwa “efuku dya kiimu” dy’Efile Mukulu, kadi “mukandu wibuwa wa bufumu” autungu kulungula ta ngufudiile penda paapa nya. (2 Mp. 3:7; Mat. 24:14) Yehowa akabula bantu babi ku Armagedone bwashi nsenga ifikye mpaladiiso.—Mis. 37:34.
4. Ndukulupilo kinyi lwatudi nalo bwa kutungunuka na kukita akikyebe Yehowa?
4 Kulungula mukandu wibuwa wa Bufumu mu nsenga iule balwishi kukwete kutuula kwilambula kwetu kwi Yehowa mu kutompibwa na kutshimbisha kitshibilo kyetu kya kukita kyakyebe. (Yowano 15:19) Sunga mbyabya, twi bakulupile shi Yehowa atungunuka na kwitupa bukome bwa kukita kyakyebe, anka bibaadi mukite bwa Amose.—2 Kod. 3:5.