Ikala na kyubishi kya kufika pa nsaa
1. Nkileshesho kinyi kyabadi betulekyele kwi Yehowa pabitale kunemeka kwa nsaa?
1 Yehowa akitaa myanda yooso nka pa nsaa. Bu kileshesho, akwashaa bafubi baaye ‘pa kipindji kyabadi na lukalo lwa bukwashi.’ (Eb. 4:16) Na dingi atuusha bidibwa bya mu kikudi “pa nguba atungiibwa.” (Mat. 24:45) Twi balombeene kwikala na lukulupilo shi kufika kw’efuku dya nsungu ya Yehowa akukalombana “kushi kutentuula efuku.” (Aba. 2:3) Kukita kwa Yohowa kwa myanda yooso pa nsaa akwitukwasha bikashaa! (Mis. 70:5) Bu byatudi bantu bakutwe kupwidika, twi na myanda ibungi ya kukita, byabya kufika kwa pa nsaa nyi ndukalakasho lukata bwetu’twe. Bwakinyi twi balombeene kukita bukopo bwa kwikala na kyubishi kya kufika pa nsaa?
2. Bwakinyi kufika kwetu kwa pa nsaa akutumbisha Yehowa?
2 Kufika pa nsaa nyi mwanda wi na muulo ukata mu ano mafuku a nfudiilo mwi bantu mbekumiine nka abo banabeene na bashii na butontshi bwa mbidi. (2 Tim. 3:1-3) Kumbi nsaa i beena Kidishitu abafiki pa nsaa ku mifubo, p’abebatengyela kwi bantu, na ku bisangilo, bangi bantu abebamono, na bino abitumbisha Yehowa. (1 Mp. 2:12) Atukitaa myanda ya mu nshaleelo etu pa nsa, kadi misusa ibungi twendanga kunyima kwa nsaa mu myanda ya mukikudi su? Kufika pa nsaa mu bisangilo bya beena Kidishitu, kupetekyela pa loono na luteko lwa mbangilo, akuleesha shi twi na lukalo lwa kwifwana Nsheetu e mwiyilu.—1 Kod. 14:33, 40.
3. Bwakinyi kufika pa nsaa akuleesha shi atunemeka bangi?
3 Dingi kufika kwa pa nsaa nyi nkuleesha kaneemo bwa bangi. (Fid. 2:3, 4) Bu kileshesho, p’atufiki pa nsaa ku bisangilo bya beena Kidishitu, na ku kisangilo kya kumpala kwa kwenda mu kulungula mukandu wibuuwa, balangwiidi n’etu t’abakalakashibwa nya. Na dingi, su atufikaa misusa yooso kunyima kwa nsaa, bangi abamono shi tukwete kwata nsaa yetu bu i na muulo kukila yaabo. Kufika kwa pa nsaa akuleesha shi we muntu mulombeene kukulupilwa, a kishima—ngikashi ayikuminaa bantu betwifunyishe.
4. Su tukwete kufika kunyima kwa nsaa, mushindo kinyi watudi balombeene koobesha kufika pa nsaa?
4 Su okwete kufika kunyima kwa nsaa, banda kutaluula bwakinyi. Elumbuule p’oobe kukita programe ebuuwa mulombeene nkukwasha bwa kukita myanda pa nsaa ilombane. (Mul. 3:1; Fid. 1:10) Teka bukwashi kwi Yehowa. (1 Yo. 5:14) Kufika kwa pa nsaa nyi mushindo umune wa kusangeela miiya ibidi ikile bukata—kufula Efile Mukulu na kufula muntu noobe.—Mat. 22:37-39.