Mushindo wa kukwasha baaba be na lukalakasho lwa kubadika

1. Ndukalakasho kinyi alumweneka nsaa y’atulambukisha bantu be na lukalakasho lwa kubadika?

¹ Bantu be na lukalakasho lwa badika mbalombeene kusangeela myanda ya mu kikudi, kadi mbalombeene kutshina Bible na ingi mikanda. Baaba bantu kwibapa mukanda wa Akilongyesha Bible, ingi misusa nkulombeene kutuusha lukalakasho. Mushindo kinyi watudi balombeene kwibakwasha mu kikudi? Atwikalanga bayipushe balungudi ba mukandu wibuwa bapatulukye ba mu maumbo akile pa 20 elekeenelekeene byabo byabakitaa. Abekalanga baleshe ino myanda ayilondo.

2. Mbiina mufubo bibuwa kinyi byatudi balombeene kukwasha nabyo muntu e na lukalakasho lwa kubadika?

² Su muntu oolongo naye tawuku sunga shi tabadika kalolo, we mulombeene kubanga na broshire, bu a Pushisha Efile, sunga a Pushisha Efile bwashi wekale na muwa wa looso. Ungi mbaala-mashinda a mu États-Unies aleshaa muntu ino broshire yooso na amwipusha yawa aadi mulombeene kusangeela. Rapore ya biro bya filiale bya mu Kenya ayilesha shi bino byamo bya mudimo bii na muulo ukata mwanda bantu ba mu Afrique, abakuminaa ngofu muntu ebalondela myanda kukila muntu ebeele nkonko bwashi baluule. Mbibofule bwa muntu mulongye kubadika na kumwela nkonko, kadi abikalakasha yawa shii mulongye ngofu. Su muntu abalongo naye auku kubadika ndambo, balungudi ba mukandu wibuwa bebungi abakuminaa kubanga na broshire a Mukandu wibuwa w’Efile Mukulu!, sunga Vous pouvez être l’ami de Dieu!, sunga pangi mukanda wa Mukanda awitulondela myanda i mu Bible.

3. Mmalango kinyi alombeene kwitukwasha bwa kwipaana nsaa y’atulambukisha bantu be na lutato lwa kubadika?

³ Ebakankamikye: Baaba bash’abauku kubadika mbalombeene kwipusha bakalakashwe, na bebungi abemono bu bashii na kineemo. Kwibakwasha bwashi bepushe bu be na kineemo ndjo mwanda wa kumpala autungu shi baaba abebalongyesha Bible balombashe. Bantu bebungi bash’ababadikaa be na binangu bikile na be peepi bwa kulonga. Ebaneemekye na webape kineemo. (1 Mp. 3:15) Abakyebe kwikala na muloo wa kulonga su abapusha shi kwitatshisha kwabo kwi na muulo na su bakwete kwenda kumpala mu kikudi. Byabya ikala wesamba nabo n’eyi dya kalolo.

4. Mushindo kinyi watudi balombeene kukankamika bantu be na lukalakasho lwa kubadika bwa shi bekale abelumbuula kumpala kwa kulonga?

⁴ Sunga muntu oolongo naye e na lukalakasho lwa kubadika, mukankamikye bwashi ekale elumbuula kumpala kwa kulonga. Bangi balungudi ba mukandu wibuwa ba mu Afrique du Sud abalungulaa bantu babalongo nabo bwabadya kuteka mwina kifuko sunga kuuku abo auku kubadika kalolo bwa shi ebakwashe bwa kwibabadikila. Ungi mulungudi a mu Grande-Bretagne atakula balongi baaye ba Bible bwa kwilumbuula, abanda kwibapa waye mukanda wadi mwilumbuule bwashi bafube nao nsaa yabalongo paragrafe ibadikye bwashi bamone mushindo wabidi bibofule bwa kupeta myalulo nsaa yoodi mwele tushoonyi mu mukanda oobe. Ungi mukwetu mulume a mu Inde akankamikaa bantu b’alongo nabo bwa kutala bifwaanyi bi mu kipindji kyabakalongo lubingo alufiki na kunangusheena pa byanka kumpala.

5. Mushindo kinyi watudi balombeene kuleesha lwishinko nsaa yatulongo Bible na muntu?

⁵ Ikala na lwishinko: Sunga wekala ofubu na mukanda kinyi, ikala wemeena pa myanda ikata, na okwashe muntu oolongo naye bwashi apushe yanka kalolo. Panukii kumbangilo, mbikile buwa kwisamba naye mu minite 10 sunga 15. Twesambanga naye myanda ikile bungi, pangi nwikwisamba ma paragrafe abadikye misango yooso. Ikala na lwishinko su muntu oolongo naye abadika bipeelabipeela. Naye namu akekala na lukalo lwa kulongamisha mushindo wa kubadika su muloo waye ukwete kutama bwa Yehowa. Bwashi okwashe muntu oolongo naye, bibuwa kumuteka bwashi abande kutwela mu bisangilo pa nukii ku mbangilo.

6. Mushindo kinyi watudi balombeene kukwasha bantu abakimbi mushindo wa kubadika?

⁶ Su balongi ba Bible abalongo bya kubadika, abakatama ngofu mu kikudi. (Mis. 1:1-3) Bantu bebungi mbakwashe balongi babo ba Bible na mukanda wa Appliquez-vous à la lecture et à l’écriture munda mwa minite ipeela ku nfudiilo kwa kulonga kooso kwakwa. Su mulongi babofula, pangi we mulombeene kumunyingisha poobe kusangula ingi myanda ibaadi moobeshe kulonga bya kwiyikita. Mushinyingishe shi Yehowa akyebe kumwelela mwabi bwa mushindo wetatshisha, na mukankamikye bwadya kuteka bwashi apete bukwashi. (Mye. 16:3; 1 Yo. 5:14, 15) Bangi balungudi ba mu Grande-Bretagne abakankamikaa bantu babalongo nabo bwa kwiatshila mpàngo ya kwenda kumpala​—pangi ya kubanda kulamiina maleeta a alfabee, bya kukimba na bya kubadika ma verse, na ku nfudiilo nkubadika mikanda ipeelepeele ayisamba myanda ya mu Bible. Kukwasha kwa bantu mushindo wa kubadika akuleesha kwibatakula bwabadya kukumiina bwa kwibikita, kushii penda kwibaleesha bya kukita.

7. Bwakinyi ta twi balombeene kupela kutwesha bya binyibinyi mwi baaba be na lukalakasho lwa kubadika?

⁷ Yehowa t’ataa baaba bantu bashii balongye ngofu na muulo upeela nya. (Yob 34:19) Yehowa akimbaa mashimba a bantu. (1 Mya. 28:9) Byabya topelanga kutwesha bya binyibinyi mwi baaba be na lukalakasho lwa kubadika. We na byamo bya mudimo bibungi byoodi mulombeene kubanga nabyo. Ku nfudiilo we mulombeene kutwesha kulonga mu mukanda wa Akilongyesha Bible na kumupatulwila Bifundwe ngofu.