Tulondoleeyi bukidibukidi bantu abaleesha lukalo

Kubanga pababadi batuushe site etu a Internet, bungi bwa bantu abatekye kulonga kwa Bible ku Internet mbukamine ngofu. Na ungi mushindo upya wa kulambukisha mu ma mbalo e bantu bebungi ngukwashe bangi bantu bwa kulonga Bible. Biro bya filiale abilondoola baaba booso bukidibukidi. Bu kileshesho, su muntu atekye bwa kulonga Bible mu jw.org, bakulu be mu yawa teritware abapete mesaje aakatukila ku biro bya filiale kunyima kwa penda mafuku abidi. Rapore ya mu teritware ayilesha shi, bangi ba ku baaba abatekye kulonga kwa Bible abakitshi mbingo ibungi kushii muntu ende mu kwibatala. Mushindo kinyi watudya kushinkamisha shi muntu ekalanga musangeele mukandu wibuwa mmupete bukwashi kumpala kwashi lukalo lwaye lutaale?​—Mak. 4:14, 15.

Su muntu baleesha lukalo te mu teritware eenu, uusha bukidibukidi kasaki ka Veuillez suivre l’intérêt (S-43) wekape sekretere a mu kakongye keenu kushii kutengyela nka ku bisangilo bikii kumpala. Nka dyadya efuku sunga kunyima kwa mafuku abidi, sekretere aukishe kakongye akatalaa yawa teritware sunga biro bya filiale; afube na konte a kakongye a jw.org. Abitungu bakulu bekale abatwele mu site eetu nsaa na nsaa. Su abapete mesaje a nkatala muntu e mu teritware aabo, abitungu bamulondoole bukidibukidi. Mulungudi a mukandu wibuwa ooso abadi batekye bwa kwisamba na yawa muntu abitungu abande kutuula wawa mwanda pa mbalo ya kumpala. Su yawa muntu te kwanka, pangi we kumulekyela adrese na nimero yoobe.