Efile Mukulu ammonaa naminyi?
1. Mushindo kinyi wi Bible e bu lumweno?
1 Misusa bungi kinyi ywetalaa mu lumweno? Bebungi ba kwatudi abelobaa efuku dyooso mwanda bino abitukwasha bwa kwimona byatudi na apatungu kulumbuula. Bible e nka bu lumweno. Kubadika kw’Eyi dy’Efile Mukulu akwitukwasha bwa tudya kutundula bi muntu a munda mwetu, muntu abamono kwi Yehowa. (1 Sam. 16:7; Ja. 1:22-24) Eyi dy’Efile Mukulu ndilombeene ‘kusokola nkalo na mitentekyesho bifwame mwishimba dya muntu.’ (Eb. 4:12, EEM) Mushindo kinyi wi kubadika na kunangusheena myanda ya mu Bible efuku dyooso akwitukwasha bwa kumona ma mbalo abofule atudi balombeene kunyingisha bwa kwikala balungudi ba mukandu wibuwa banyingye?—Mis. 1:1-3.
2. Mushindo kinyi wi Bible etukwasha bwa kwitaluula?
2 Fubisha Bible bu lumweno: Myanda ya bafubi ba Yehowa i mu Bible ayitulongyesha ngikashi ibuwa yasangelaa. Bu kileshesho, Daavide baadi muleeshe katshintshi bw’Eshina dy’Efile Mukulu. (1 Sam. 17:45, 46) Na katshintshi kooso, Yeeshaya bakuminyine kulambukisha mu ma mbalo e bukopo. (Yesh. 6:8, 9) Kifulo kikata kibaadi nakyo Yesu bwa Nshaye a mwiyilu kubaadi kimutakule bwa kumona mudimo waye wa bulungudi bu nsulo ya kutaadisha eshimba na ya muloo pamuntwe pa kwibimona bu bushito bumupebwe. (Yo. 4:34) Beena Kidishitu ba bipwa lukama bya kumpala abaadi abalambukisha na katshintshi kooso, bakulupile mwi Yehowa, na baate kitshibilo kya kulambukisha mpa na ku nfudiilo. (Bik. 5:41, 42; 2 Kod. 4:1; 2 Tim. 4:17) Kunangusheena ku bingi bileshesho akwitukwasha bwa kwitaluula na kepatshila ka kulumbuula mudimo wetu wi selele.
3. Bwakinyi t’abitungu kulaa bwa kwaluluka?
3 Lumbuula bilema: Byabya, ta bi buwa shi twitale mu lumweno na musango umune twilwankane kilema. Twi balombeene kuteka Yehowa bwa kwitukwasha bwashi twitundule byatudi na kwitukwasha bwa kwilumbuula. (Mis. 139:23, 24; Luk. 11:13) Bu byabidi shi nsaa ibashaala ngipeela na miuwa i mu masaku, t’abitungu kulaa bwa kwaluluka nya.—1 Kod. 7:29; 1 Tim. 4:16.
4. Nkinyi akifiwila muntu ataluula ndambukiisho ya Mwiyi dy’Efile Mukulu na atumikila myanda ibafumbula?
4 Muntu eetu mufwame a mwishimba—yawa abatalaa kwi Yehowa—e na muulo kukila uno amweka na meeso. (1 Mp. 3:3, 4) Nkinyi akifwila muntu ataluula ndambukiisho ya Mwiyi dy’Efile Mukulu na atumikila myanda ibafumbula? “Tasangala nka penda kupusha kunyima nkwilwa ooo, anka ekikitshi, yawa muntu akedibwa mwabi n’Efile Mukulu ku byabya byakitshi.” (Ja. 1:25) Oolo, atukyebe kwikala na muloo na kwikala balungudi bebuwa mwanda “tukwete kulêsha ntumbo ya Yehowa bu mmweno ayituusha nsembwe.”—2 Kod. 3:18, EEM.