Tokishanga nsaa yooso yoodi na mushindo wa kupalakasha mukandu wa Bufumu!

1. Kileshesho kya Daavide akitulongyesha kinyi?

¹ Nfumu Daavide tabaadi atadiila bwashi nshaleelo aaye amubofushe nya. Bu kileshesho, Daavide baadi na lukalo lwa kwibakila Yehowa nshibo. Nsaa ibabadi bamupele bwa kwiyibaka, Daavide baadi mutaluule bipatshila byaye na alumbuula myanda mu mushindo wa shi Salomone ayibaka ntempelo. (1 Bf. 8:17-19; 1 Mya. 29:3-9) Pamutwe pa kwimeena pa myanda yashii mulombeene kukita, Daavide baadi mwimeene pa myanda yaadi na mushindo wa kukita. Mushindo kinyi watudi balombeene kwambula kileshesho kya Daavide bu byatukwete kukimba mishindo ya kupalakasha mukandu wa Bufumu?

2. Mushindo kinyi watudi balombeene kwitaluula?

² Kita kyakya kyoodi mulombeene kukita: Bantu bebungi mbapeelepeeshe nshalelo aabo mu mushindo washi bapete nsaa ya kukita mudimo wa bu mbaala-mashinda mukwashi sunga a myeshi yooso. (Mat. 6:22) We mulombeene kwikala umune a kwabadi su? Bu byokwete kutaluula nshaleelo oobe mu luteko, we mulombeene kumona shi mbakufungwile “eshinda dikata dya kufuba mudimo”. Su mbyabya, tokumanga kukisha yaaya nsaa!​—1 Kod. 16:8, 9.

3. Sunga mbyabidi shi nshalelo eetu mmulombeene kwitukutshisha mushindo wa kwikala mbu mbaala-mashinda, nsaa kinyi ayitumwekyela yatudi balombeene kulambukisha?

³ Nkinyi kyoodi mulombeene kukita su twe na mushindo wa kufuba bu mbaala-mashinda? Tobeepulanga ingi nsaa yokwete kupeta yoodi na mushindo wa kulungula mukandu wibuwa. Bu kileshesho, su mbalo y’ofubaa okwete kufumankana na bantu bashii bena kukumiina, bwakinyi twemulombeene kukimba nsaa ilombane bwa kwibalungula mukandu wibuwa? Sunga shi su okwete kukumba, we mulombeene kukimba mushindo wa kulambukisha baaba ba munganga bakwete nkubuka? Tentekyesha shi akwikalaa mpàngo yatshiibwe shi yawa muntu mufudiile pa mwanda wa bununu sunga wa mukumbo wi bukopo atuushe rapore yaaye ya mudimo mu bungi bwa minite 15. Nsaa y’otuusha rapore yoobe ya ku mweshi, abitungu oshinkamishe shi bosangisha mpa na nsaa yoyikalanga mulambukishe mu mpuuka-puuka mpa na yaaya mikanda ywekalanga mupe bantu, kushii kuluba ma trakte na masaki a lwitamino lwa ku Kitentekyesho na ku kikongeno. We mulombeene kukema pa kumona mushindo aukaamina bungi bwa ino nsaa ayimweneka bu ipeela obe beyisangisha pamune!

4. Bwata kitshibilo kinyi?

⁴ Sunga twekala mu nshalelo a mushindo kinyi,tatukumanga kukisha nsaa yooso yatudi na mushindo wa kupalakasha mukandu wa Bufumu. Su tubakitshi byabya, atukapete muloo wa kuuka shi tukwetu kukita myanda yooso yatudi balombeene bwa kukimba Bufumu.​—Mak. 14:8; Luk. 21:2-4.