Kulonga Bible na bantu na kishima kyooso
1. Mbushito kinyi bwinabo balungudi abalongo na bantu Bible?
1 Ta kwi muntu mulombeene kufubila Efile Mukulu su Yehowa “tamumukakye.” (Yo. 6:44) Sunga mbyabya, balungudi bakwete kulonga na bantu Bible bakwete kukwasha bantu bwabadya kwifubwila pepi na Nshabo a mwiyilu. (Ja. 4:8) Bino abitekye kwilumbuula. Kubadika ma paragrafe bisumanga na kwela lukonko lwi mu mukanda ta nkulombane bwa kukwasha balongi bwashi balamiine myanda yabalongo na kwenda kumpala nya.
2. Bwa kulonga na muntu Bible na kishima kyooso, abitungu kulombasha myanda kinyi?
2 Bwa kulonga Bible na muntu na kishima kyooso, abitungu mulungudi akwashe balongi baaye bwashi (1) bapusha kalolo akilongyesha Bible, (2) bakumiine akilongyesha Bible, na (3) batumikile akilongyesha Bible. (Yo. 3:16; 17:3; Ja. 2:26) Mbilombeene kwata myeshi bwa kukwasha muntu bwashi alombashe ano matabula. Na dingi, etabula dyooso adileesha kipindji kya kutamisha kipwano kyabo na Yehowa na kwilambula kwadi.
3. Bwakinyi balongyeshi ba kishima abayipushaa nkonko ya kuuka ki mwishimba dya muntu?
3 Muntu okwete kulonga naye Bible apwandjikisha kinyi?: Bwa kutundula su mulongi eetu a Bible kwete kupusha na kukumiina byabya byakwete kulonga, leka kwikala penda omupatulwila myanda yooso, mukankamike bwa dya kwakula aye nabeene. (Ja. 1:19) Bapusha akyakula Bible pabitale mwanda wanukwete kulonga? Mmulombeene kwibipatuula mu bishima byaye aye nabeene su? Kwete kupusha naminyi pabitale byabya byadi mupwe kulonga? Akumiina shi byabya abilongyesha Bible mbya binyibinyi? (1 Tes. 2:13) Kwete kupusha shi yaaya myanda yakwete kulonga ngilombeene kumwaluula mu nshaleelo aaye? (Kol. 3:10) Bwa kupeta myaluulo ku ino nkonko, abitungu kumwela nkonko na mayele bwa kuuka byapwandjikisha, akupu nkumuteemesha.—Mat. 16:13-16.
4. Nkinyi akitungu kukita su mulongi takumiina na kutumikila byabya byakwete kulonga abikatukila mu Bible?
4 Biubishi na nangunangu ya bantu mbishimate ngofu na abyata nsaa ibungi bwa kwibishimisha. (2 Kod. 10:5) Su mulongi eetu ta mukumiine sunga kutumikila byabya byatukwete kumulongyesha twi kukita kinyi? Abitungu lwishinko bwa kuleka ndambo ya mafuku bwashi Eyi dy’Efile Mukulu na kikudi kiselele bifube mwishimba dya mulongi. (1 Kod. 3:6, 7; Eb. 4:12) Pamutwe pa kumukitshisha myanda pa bukopo, mbikile buwa kukila ku ungi mwanda su mulongi takumiina sunga kutumikila malongyesha a mu Bible. Bu byatukwete kuyididiila na kumulongyesha na lwishinko na kifulo abituukila mu Bible, ingi nsaa mmulombeene kwitatshisha bwa kutaluula ingi myanda mu nshaleelo aaye.