Tungunuka na kuyididiila bu mufubi
1. Bileshesho kinyi bya mu bipwa lukama bya kumpala abileesha shi twi balombeene kutungunuka na kuyididiila bu bafubi?
1 Beena Kidishitu mbalombeene kutungunuka na kwenda kumpala bu bafubi. Nyi bwakinyi Yesu baadi mulongyeshe balondji baaye ku kapeela kapeela. (Luk. 9:1-5; 10:1-11) Nyi bwakinyi dingi Akila na Prisile abaadi baate Apolose na “bamupatulwila kalolo [bi] eshinda dy’Efile Mukulu.” (Bik 18:24-26, Kilombeno kipya 2009) Bwa kaaka kabingilo kamune, Mpoolo baadi mukankamikye mulungudi sha kishima Timotee bwadya kwipaana na kutumikila malongyesha aaye bwashi kwenda kwaye kwa kumpala kumwekye ku “meeso kwa bantu booso.” (1 Tim. 4:13-15) Sunga twapwa kufubila Mwanana mafuku e bungi pa kulungula mukandu wibuwa, twina lukalo lwa kuyidiidila na kulumbuula kiukilo kyetu kya kulambukisha.
2. Mushindo kinyi wa tudi balombeene kulonda kileshesho kya bangi?
2 Londa kileshesho kya bangi: Mushindo umune wa kulongamisha mudimo wetu nyi nkulonda kileshesho kya bangi. (Mye. 27:17) Byabya, teemesha kalolo nsaa i balungudi noobe ababanga mwisambo. Ipusha mayele e buwa abadi bafube nao kwi balungudi abafubaa kalolo, na otee matwi ku myanda yabakulungula. (Mye. 1:5) T’ouku mushindo wa kulekyela muntu lukonko bwa kwalukiila mu nkamutala, kubanga kulonga naye Bible, sunga kubanga ingi mishindo ya mudimo wa bulungudi? Ata kitshibilo, na otekye mukunkushi a kasaka kenu ka bulungudi sunga ungi mulungudi afubaa kalolo bwashi akukwashe. Ikala otentekyesha shi, kikudi kiselele kya Yehowa nkilombeene kulumbuula biubishi byetu, byabya ikala otekye Yehowa bwashi akupe kyanka.—Luk. 11:13.
3. Twi balombeene kukita naminyi su betuleesha mayele kampanda bwashi tulumbuule mudimo wetu, pangi ta ngatuushe bipeta bibuwa?
3 Su bakuleesha mayele kampanda bwashi olumbuule mudimo oobe, tokumanga kufiita munda su ta ngatuushe bipeta bibuwa. (Mul. 7:9) Anka bu Apolose, kumiina bukwashi na lutumbu na kwiyisha kooso. Kukita byabya nyi nkuleesha kwa binangu.—Mye. 12:15.
4. Nkabingilo kinyi kakata kabaadi Yesu mutuushe bwa kuyididiila kumpala bu bafubi?
4 Ididiila na kutumbisha Efile Mukulu: Ku bukwashi bwa kileshesho, Yesu baadi munyingishe balondji baaye bwa kwenda kumpala bu bafubi. Baadi mwi pwandjikishe aye nabeene na mutshi wa nfinyo na balondji baaye bashingwe mwimu bu ntabi. Aye kwakula shi Yaya asoosweela katabi kooso akatusha bikuba “bwa’shi kape bikuba bibungi.” (Yo. 15:2) Anka bu byabidi shi sh’efuba dya nfinyo e na lukalo lwa ntabi bwashi mitshi yaaye ya nfinyo ipe ngofu, Yehowa akumiina shi atwe tutungunukye na kukula mu biubishi byetu bya kutuusha “bikuba bya ku milomo yeetu.” (Eb. 13:15, NWT) Nsaa y’atutungunuka na kuyididiila kumpala bu bafubi mbipeta kinyi bya muloo byatupete? Yesu baadi mwitwaluule: “Akipa Nshaami ntumbo nkutuusha kwenu kwa bikuba bifiime.”—Yo. 15:8.