Fubayi na nsaa yeenu kalolo mu bulungudi
Mu kipwa kya mudimo kya 2014, Batemwe ba Yehowa mbakishe nsaa 1 945 487 604 mu bulungudi—bishinkamiisho abileesha batooka shi twi baate kitshibilo kya kwipaana mu mudimo wa Yehowa! (Mis. 110:3; 1 Kod. 15:58) Sunga mbyabidi shi ‘nsaa ibashaala ngipeela’ kwi mushindo washi twafuba na nsaa yeetu mu bulungudi bwa kwisamba na bantu booso?—1 Kod. 7:29.
Bwa kufuba kalolo na nsaa yeetu mu mudimo wa bulungudi abitungu twikale basasakate. Bu kileshesho su misango yooso okwete kukisha nsaa umune sunga ibungu mu kingi kipaso kya bulungudi kushii kwisamba na muntu sunga ngumune, we mulombeene kushintuula myanda kampanda mu mushindo washi ofumankana na bantu be bungi na kwisamba nabo? Myanda ngilekeene muyiile ma mbalo. Byabya ano mayele aalondo ngalombeene kwinukwasha bwa kufuba kalolo na nsaa yeenu mu mushindo washi tanukumanga ‘kukupila makofi mu lupapi.’—1 Kod. 9:26, EEM.
Kulungula kwa mukandu wibuwa ku nshibo na nshibo: Takudi bipwa makumi, balungu be nka na kipikwa kya kubanga efuku dyabo na kulungula kwa mukandu wibuwa ku nshibo na nshibo. Byabya, bu byabidi shi bantu be bungi bakwete kufuba munda mw’efuku, bwakinyi tanwibalombeene kulungula mukandu wibuwa wa ku nshibo na nshibo nguba bekumbu sunga ku kyoolwa, nsaa i bantu be ku mashibo na abaapu kwikisha? Munda mw’efuku, kulungula mukandu wibuwa mu misese na mu ma mbalo a busunga nkulombeene kutuusha bipeta bibuwa.
Kulungula kwa mukandu wibuwa mu mbalo i bantu be bungi: Nwi balombeene kutuula ma mesa na tutempo mu ma mbalo amukiila bantu be bungi e mu teritware eenu. (Tala Mudimo wetu wa Bufumu wa 7/2013, esk. 5.) Su baaba abatambuka lwa ngwa abapeele mu mbalo yanudi basangule bwa kulungula mukandu wibuwa mu mbalo i bantu be bungi, Kasaka ka mudimo ka kakongye nkalombeene kwata kitshibilo kya kusangula ingi mbalo ikwete kukiila bantu be lwa ngwa ayitungu shi nubangye kutuula katempo sunga mesa.
Kwalukiila mu kutala bantu na kulonga nabo Bible: Mbibofule kukita programe a kwalukiila mu kutala bantu na kulonga nabo Bible nsaa i ingi mishindo ya bulungudi ta itusha bipeta bi buwa? Bu kileshesho, su bulungudi bwa ku nshibo na nshibo abutuusha bipeta bi buwa mu dya Mpooso ku namashika, we mulombeene kwenda mu kulonga Bible na bantu kunyima kwa midi sunga ku kyolwa? Nsaa ya kwalukiila mu kutala bantu, balungudi mbalombeene kwata mpàngo ya kwenda ingi nsaa mu nkatala balongi baabo bashaale mu mbalo imune bwabadya kukumbasha mudimo wabo kalolo?
Sunga mbyabidi shi twi balombeene kubadika nsaa yeetu patudi mu bulungudi, muloo wetu autama nsaa y’atutuusha bipeta bi buwa. Su nubamono shi ingi nsaa kukita mushindo umune wa bulungudi t’autuusha bipeta bi buwa, tompayi ungi mushindo. Tekayi Yehowa, “Nfumu abyumbulwanga,” bwashi enukukunkushe, byabya anwikala na mushindo wa kufuba na nsaa yeenu kalolo mu bulungudi!—Mat. 9:38.