Myanda ya kutentekyesha pabitale kikongeno kya mafuku asatu
Nsaa ayikitshika kikongeno: Programe akabanga mu 8:20 mafuku ooso asatu. Byabya, bwa bikongeno abikitshika mu ma mbalo akata bu: Bandundu-Ville, Boma, Brazzaville, Bumba, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji-Mayi, Mwene Ditu, Pointe Noire na Tshikapa, programe akyebe kubanga mu 9:20. Abafungula biibi mu 7:00 sunga mu 8:00 muyiile mbalo yanudi. Nsaa ayibanga mizike abitungu atwe booso twende tukashaale mu ma mbalo eetu bwashi programe eetu abangye kalolo. Programe akyebe kufudiila mu 15:55 mu dya Katano na mu dya Mpooso, na mu 14:40 mu dya Lubingo. Mu bibundji bikata abakyebe kufudiisha nsaa umune kunyima.
‘Kutumbisha Yehowa na loono’: Mwilo w’Efile Mukulu wa mu mafuku a kala ubaadi autumbisha Yehowa na loono, na mizike i kiina muulo ukata mu lulangwilo lwetu lwa binyibinyi lelo uno. (Mis. 28:7) Kipidji kyooso kya kikongeno kyetu kya mafuku asatu akibanga na mizike ya mbangilo. Ino ta mizike ya bisumanga nya, kadi mbeyilumbuule mu kipaso kyashi tulongye pa bitale Yehowa na kumulangwila. Byabya, nsaa i mukunkushi aukisha shi mizike ya mbangilo ibabanga, abitungu tushaale na tuteemeshe mizike na muloo ooso, pamutwe pa kwikala munkatshi mwa ntentekyeshi. Kukita kwetu kwa byabya akuleesha shi atwata kwitatshisha kwa bakwetu ba mu kisaka kya kuyimba kya Watchtower na muulo. Misusa ibidi ku kipwa, bano bakwetu balume na bakashi abendaa mu makuta aabo’bo banabeene ku Patterson mu New York bwa nkakita mizike i buwa bukile bwashi twiyisangeele. Kunyima kw’atwe kutee matwi kalolo ku mizike ya mbangilo, ooso a kwatudi mmulombeene kubunga eyi dyaye bwa kusamuna Yehowa nsaa y’atuyimbi ngono ya Bufumu.
Mbalo ya kushaala: We mulombeene kulama mbalo nka penda ya baaba banudi nabo mu nshibo imune sunga ya bantu banudi bafikye nabo mu motoka umune sunga dingi ya bantu bolongaa nabo Bible.
Nfwadilo ebuwa: Nfwadilo eetu nsaa ya kikongeno abitungu ekale ebuwa na mulombane, sha leesha nfwadilo a uno ndumbulwilo mubi. (1 Tim. 2:9) P’atusangula bilamba bya kufwala munda sunga pasha pa otele na nsaa yatukisha kapapi kumpala na kumyima kwa kipindji kya kikongeno, t’abitungu shi tufwale bilamba binane mbidi sunga bilombeene kukalakasha bangi nya. Nyi bwakinyi twi na muloo wa kufwala katadi keetu ka kikongeno pa kyadi na tatwikala bakalakashwe bwa kulungula mukandu wibuwa pakudi mushindo nya. Mushindo awitumono bantu na mwikeelo wetu wi buwa nsaa yatudi mu bikongeno bya mafuku asatu t’awikadika penda bwa kukaka bantu basha mashimba alulame bwa myanda ya mu Bible ayipaasha miuwa nya, kadi aukyebe kusangasha dingi Yehowa.—Sof. 3:17.
Mwikeelo wi buwa nsaa y’atufubu na twamo twa ku maasa: Atuleesha kanemo mu nsaa ya kikongeno pa kufunga twamo twetu twa ku maasa sunga kwitwela mu vibreur bwashi tatukalakashanga bangi bantu be mu kikongeno. Su atufubu na kamera, tablette, kukoboola video, sunga tungi twamo twi byabya, twibalombeene kwikala na kanemo pa kukutwa kukalakasha bangi sunga kwibashikiila. Atulesha dingi kaneemo pa kukutwa kwitumisheena ma mesage ashii na muulo nsaa ikwete kukitshika kikongeno. Talanga, tanukumanga kwitamina baaba abakwataa ma foto a makuta mu mbalo ya kikongeno. Su nwebamona bakwete kukwata ma foto pa mbalo ya kikongeno, tanukumanga kukwatshisha kwabadi.—Yo. 2:13-17.
Kidibwa kya mu midi: Atwinutekye shi nutwale bintu bipeelepeele kadi abikwasha mu mbidi, bu kileshesho nwi kutwala bidiibwa bu (nkunde sunga mupunga), bikuba (makonde), nyimu, mikate sunga bitumbula. Bitomwanga bu meema, kafee sunga tshayi nwibalombeene kwibyela mu bintu bishi bilombeene kutanyika bwa kupela masaku. Mbakandjikye kufika na maalwa ku mbalo ya kikongeno. Su tubatwala bidibwa na bitomwanga byetu, tatwikala na lukalo lwa nkaula kintu sunga nkimune kwi baaba abafiki mu kuudisha. Kupela kuula byabya bintu bya paasha akutuusha nkumo yeetu ibuwa ya mukoso. (Laminayi bino: Tanukumanga kutwesha bantu abapaana bya kudya pa mbalo ya kikongeno.—Yo. 2:13-17).
Bya buntu: Twi balombeene kuleesha shi twi basankile mpàngo yatshibwe bwa kikongeno nsaa yatwele bya buntu byetu ku kikongeno pa bitale mudimo wa nsenga ishima. Muntu ooso mulombeene kutuusha chèque mmulombeene kumufunda mwishina dya “Association ‘Les Témoins de Jéhovah.’”
Bukwashi bwa bwanga: Bibuwa kutwala manga oobe su okwete kukumba, mwanda ta kwi manga ku mbalo ya kikongeno nya. Nshingye na bipusu byayo bya muntu akumbaa maladi a dyabete, abitungu kwibisumbula mu kintu kyabadi baleeshe bwa kwela bintu bi butshafu na bimasaku ki pa mbalo ya kikongeno na koodi mushaleele.
Masaku na mikumbo ya kimpulunkamba: Su muntu apetekyelwa na masaku sunga mukumbo wa kimpulu nkamba mu kikongeno, itaminayi mukwetu e peepi a ku baaba abakukila bantu yawa namu akakimbe ba mu Departema atala myanda ya maladi bwashi bape yawa mukwetu bwanga bwa kubanda kumukwasha.
Masaki a Veuillez suivre l’intérêt (S-43-F): Nwi balombeene kufuba na masaki a Veuillez suivre l’intérêt bwa kufunda myanda itale muntu atubalambukisha mu mpuukapuuka ku kikongeno baleesha lukalo lwa kulonga. Masaki ooso obowusha we mulombeene kwiatuula ku Departema a mikanda sunga kupa sekretere a mu kakongye keenu.
Mu ma restora: Tumbishayi eshina dya Yehowa na mwikeelo wenu wibuwa panudi mu restora. Nfwadilo eenu aleshe shi nwi beena Kidishitu. Paayi yawa enukwasha na byakudya matabishi su abebikitaa kwenu.
Mbalo yatukashaala:
Tanukumanga kutuula bantu bakile bungi mu nshibo sunga mbalo yabadi benutuule; kukaasha bungi bwabadi batekye kwi yawa enukukila.
Su we na yoobe mbalo yoodi mupwe kwilumbulwila bwa nkashaala, bibuwa kwiukisha kumpala.
Kumpala kwa kuteeka, ipusha yawa muntu mwinutuule ku nshibo yaaye sunga baaba abalama Nshibo ya Bufumu bwa kutuula bantu bwashi benulungule abitungu kukita.
Tokumanga kulwisha kintu kyooso kya kudya kyabadi batuule mu yaaya mbalo yabadi benutuule. Abitungu kwikala na nkatshinkatshi, na binangu.
Nsaa yooso abitungu kuleka mbalo yabadi benutuule ibuwa, ishii butshafu, na ilongye bintu byooso mu mulongo. Bino mbitale mpa na ku Nshibo ya Bufumu, yabadi balombeene kutuula bakwetu abafiki kwibula bwa kushaala mwanka mafuku a kikongeno.
Leshaayi kikuba kya kikudi kiselele nsaa yanudi bashaale na bangi bakwetu, byabya, byabikala yawa mwinutuule kwaye sunga ungi mukwetu mwina Kidishitu anudi naye mu nshibo imune.—Gal. 5:22, 23.
Bukwashi ku midimo: Muntu ooso akumiina kukwasha ku midimo ya mu kikongeno, mulombeene kwenda ku uno Departema e ku kikongeno. Mwana e muushi mwa bipwa 16 mmulombeene kufuba anka su e na muledi aaye, sunga ungi muntu mukulu a kumukunkusha abadi bamupe kwi baledi baaye.