Shaala mwipaane mu kwikasha bantu bu balongi
1. Bwashi bantu bapande, abitungu kukita kinyi?
1 Rapore ya kipwa kya mudimo kya 2014 ngileeshe bi katshintshi na kwipaana kwa mwilo w’Efile Mukulu bwa kulungula mukandu wibuwa wa Bufumu. (Mat. 24:14) Ku bukwashi bwa bulungudi bwa ku nshibo na nshibo, kampanye ka kwabila bantu ma trakte na masaki a lwitamino, na mpàngo yeetu ya kulambukisha mu ma mbalo e bantu be bungi, tukwete kulambukisha bantu bebungi myanda ya mu Bible kukila kumpala. Sunga mbyabya, bwashi bantu bakapande, abitungu tubande kwibakwasha bwabadya kufika balongi ba Yesu p’atwe kulonga nabo Bible.—1 Tim. 2:4.
2. Nkonko kinyi yatudya kwiyela ayitukwasha bwa kubanga kulonga Bible na bantu?
2 Etatshishe bwa kubanga kulonga Bible na bantu: Nsaa ayileesha muntu lukalo, okitaa bukopo bwa kupeta adrese yaaye ilombane na kwenda mu kumutala kushii kunyengakana na kepatshila ka kubanga kulonga naye Bible su? Mususa kinyi wa nfudiilo wekalanga mutompe kulonga Bible na muntu oyikalanga mufumankane naye bwa mususa wa kumpala? Mususa kinyi wa nfudiilo wekalanga mulongye Bible na muntu a ku baaba botwadilaa ma jurnale mweshi ooso? We muleeshe bena mudimo noobe, bena kalasa, bekungishanyi noobe, bakwenu, na bangi bantu bweukeena nabo video a Bwakinyi abitungu kulonga Bible? na a Kulonga kwa Bible akukitshikaa naminyi? Nsaa y’ofubu na kantempu ka kuleesha mikanda, wekitshishaa bwa kulungula baaba abaata mikanda ya kulonga shi, i kwanka bwa kulonga Bible na bantu buntu su?
3. Nkinyi akitungu bwashi tulongyeshe bya binyibinyi kalolo?
3 Yehowa na Yesu abetukwasha: P’aye kutuma eyi dya ‘kwikasha bantu bu balongi’ na kubanga na kishima kya shi “ndaayi,” Yesu baadi muleeshe shi twi na lukalo lwa kwitatshisha ngofu na kubanga kukimba bantu. Byabya, ta mulombeene kwituleka bupenka nya, kadi etulaa bwa kwikala neetu. (Mat. 28:19, 20) Na dingi, Yehowa mmwitupe kikudi kyaye kiselele anka bu byadi mwitupe biina mudimo mpa na kulambukishwa kwatudi nako lukalo bwa kulongyesha bya binyibinyi. (Za. 4:6; 2 Kod. 4:7) Twi balombeene kuteka bwashi tupete “mashimba na bukome” bya kufuba ngofu mu uno mudimo ukata.—Fid. 2:13.
4. Bwakinyi abitungu shi tushaale bepaane mu kwikasha bantu bu balongi?
4 Kulambukisha mukandu wibuwa akwitufwishisha miloo ikile bungi. Byabya muloo wetu autama ngofu nsaa y’atulongyesha muntu bya binyibinyi na kumukwasha bwashi etulonde ‘mwishinda adifishanaa ku muuwa.’ (Mat. 7:14; 1 Tes. 2:19, 20) Nsaa y’atushaala nka bepaane mu kwikasha bantu bu balongi, atusangasha Yehowa ‘sh’akumiina’shi kushimine muntu su ngumune, anka’shi booso bafikye mukwilanga.’—2 Mp. 3:9, Kilombeeno kipya 2014.