Kasheete keetu ka biina mudimo bya kulongyesha nabyo
1. Balungudi ba mukandu wibuwa mbefwaneene na nsendwe naminyi?
1 Nsendwe afubaa na biina mudimo bilekeenelekeene. Sunga mbyabidi shi ingi nsaa abitungu kufuba na bingi byamo bwa kukita mudimo wi pabwao, bingi byamo bya kitako abafubaa nabyo nsaa na nsaa. Nsendwe mukata ekalaa na byabya biina mudimo bya kitako mu kasheete kaye ka byamo, na byabya byamo mbino abikyebe mayele ebungi bwa kufuba nabyo. Bible anyingisha mwina Kidishitu ooso bwadya kwipaana mu bulungudi na bwadya kwikala “mwina-mufubo shii na kya kupusha buufu.” (2 Tim. 2:15) Nkyamo kinyi kya mudimo kiina muulo ukata ki mu kasheete keetu? Nyi Eyi dy’Efile—kyamo kikata ky’atufubu nakyo bwa ‘kwikasha bantu bu balongi.’ (Mat. 28:19, 20) Byabya, abitungu tukite mwetu mooso bwa kwikala atufubu kalolo mu ‘kuukisha na bululame mukandu wa binyibinyi.’ Sunga mbyabya, kwi bingi byamo by’atufubaa nabyo ngofu bi mu kasheete keetu ka byamo abitungu shi beena Kidishitu booso balongye bya kutumika nabyo kalolo bwa kulongyesha bantu bya binyibinyi.—Mye. 22:29.
2. Twi na biina mudimo kinyi bya kitako bya kulongyesha nabyo?
2 Biina mudimo bya kitako bya kulongyesha nabyo: Kukaasha Bible, bingi biina mudimo kinyi abitungu shi tufube nabyo? Kiina mudimo kya kumpala kyatudi nakyo bwa kulongyesha bya binyibinyi bya mu Bible nyi mukanda wa A nkinyi akilongyesha namu bible? Kunyima kwa kupudisha kulonga uno mukanda ooso na mulongi, atutumika dingi na mukanda wa “Elameeyi mu kifulo ky’Efile Mukulu” bwa kumulongyesha bya kutumikila Miiya ya mu Bible efuku dyooso dya mu muuwa waye. Byabya, abitungu tushinguule kalolo bya kutumika na yaaya mikanda ibidi. Twi balombeene kutwesha dingi angi ma broshire mu kasheete keetu ka biina mudimo. Broshire a Mukandu wibuwa w’Efile Mukulu! ngumune wa ku biina mudimo bikata bya kubanga nabyo kulonga Bible na bantu. Su mu teritware eetu mwi bantu bash’abauku kubadika kalolo sunga abakula ludimi lwatudi bakutwe mikanda sunga lwatudi nayo ndambo, yaaya nsaa twi balombeene kufuba dingi na broshire a Pushisha Efile, sunga Pushisha Efile bwashi wekale na muwa wa looso. Kiina mudimo kya kulongyesha nakyo mulongi bwa kumuludika ku ndumbulwilo nyi broshire a Mbantu kinyi bakwete kukita akikyebe Yehowa lelo uno? Kwi ma video aakwasha mu kufwisha bantu bu balongi, bu ano aalondo: Bwakinyi abitungu kulonga Bible?, Nkinyi akikitshikaa ku Nshibo ya Bufumu?, na Dieu a t-il un nom? Bino nyi mbiina mudimo abitungu shi tulongye bya kutumika nabyo kalolo.
3. Mbukwashi kinyi bwatupete mu masaki a Mudimo Wetu wa Bufumu a myeshi ayifiki?
3 Mu masaki eetu a Mudimo wa Bufumu a myeshi ayifiki, atukapete bukwashi bwa kufuba kalolo na ndambo a mikanda ya kitako i mu kasheete keetu ka bulungudi. Bu byatwitatshisha bwa kufuba na bino biina mudimo kalolo, atukakunkushibwa n’elango diyookyelwe adyamba shi: “Dimuka p’abikutala obe nabeene na bulambukishi boobe, wemutuule katshintshi. Pa kukita byabya binyibinyi, nyi p’okeepaasha obe nabeene mpa na bano abakuteemesha.”—1 Tim. 4:16.