Tulonde kileshesho kya batemuki—Abakuke
1. Bwakinyi ingi misusa twi kupusha’nka bu bibapushishe Abakuke?
1 Bu byatukwete kumona buntomboshi abwende na kutama pa nsenga, twi bya kupusha nka bu bibapushishe Abakuke bepwishe Yehowa’shi: ‘Mmwanda kinyi okumîna shi mmone buno bubi? Mmwanda kinyi okwete kutadîla kuno kumweshana kwa malwa?’ (Aba. 1:3, EEM; 2 Tim. 3:1, 13) Nsaa yatunangushena ku mayi a Abakuke na kileshesho kya lukumiino mbilombeene kwitukwasha bwa kunyingila patukyatutengyela efuku dya kiimu kya Yehowa.—2 Mp. 3:7.
2. Mushindo kinyi watudi balombeene kuleesha shi twi na lukumiino lelo uno?
2 Ikala na lukumiino: Pamutwe pa kukalakashwa na myanda ibubi, Abakuke bashele mupasukye mu kikudi na atengyela. (Aba. 2:1) Yehowa baadi mushinkamiishe mutemuki shi eyi Dyaye adikalombana pa nsaa ilombane na shi “mululame ashala na muuwa bwa kishima kyaaye.” (Aba. 2:2-4) Bino abileesha kinyi bwa beena Kidishitu bakwete kufumankana na nkalakashi mu ano mafuku a ku nfudiilo? Ki na muulo ukata nyi kwikala bashinkamishe shi nfudiilo ayikafiki ta nkuuka nsaa yayikafiki nya. Lukumiino alwitutakula bwa kushala bapasukye na kutuula mudimo wa bulungudi pa mbalo ya ku mpala.—Eb. 10:38, 39.
3. Bwakinyi abitungu tulame muloo wetu wa kufubila Yehowa?
3 Sankila mwi Yehowa: Nsaa ayikatuuku Goge a ku Magoge mwilo wa Yehowa ngoshi, lukumiino lwetu alukekala mu kutompibwa. (Ez. 38:2, 10-12) Ngoshi ayifwishaa nkalakashi, mpa na kwi abatshokola. Bidibwa bi kupwa, bintu bya bantu mbilombeene kushimina na mwikelo wa bantu wi kulwila. Twi kukita naminyi nsaa ayituku nkalakashi? Abakuke baadi mupete nkalakashi, kadi baadi mwate kitshibilo kya kulama muloo waye mu kufubila Yehowa. (Aba. 3:16-19) “Muloo wa Yehowa” auketukwasha dingi bwa kunyingiila nkalakashi ya mu mafuku aafiki.—Ne. 8:10; Eb. 12:2.
4. Muloo kinyi watudi balombeene kupeta kubanga binobino na mu mafuku aafiki?
4 Baaba babakapasha kwi Yehowa kwifuku dyaye dya kiimu abakatungunuka na kulogyeshibwa mu mashinda aaye. (Aba. 2:14) Baaba abakasanguka, abakalongo pabitale Yehowa. Bwa binobino, apamweka mushindo ooso, twakuleyi pabitale Yehowa na bwa mifubo yaye ya kukanya!—Mis. 34:1; 71:17.