NSHALELO A BWINA KIDISHITU

Kipindji kipya kya mu bisangilo bya mu nkatshi a lubingo

Kubanga mu mweshi wa Kumpala 2018, mu bisangilo bya munkatshi a lubingo atubanga kutaluula ma note, bifwatulo na ma video bi mu Bible a Traduction du monde nouveau mupya a kwilongyela naye ku Internet (nwtsty), sunga akutwa kwikala mu kisongye. Kushi mpaka, yaya myanda ayikala ayikukwasha nsaa yolumbuula bisangilo. Dingi, ayikukwasha bwa kwifubwila pepi na Yehowa Nshetu sha kifulo!

MA NOTE AAKWASHA BWA KWILONGYELA

Ano ma note aakwasha bwa kwiuka bipikwa, ma mbalo na ndimi bi mu ma verse ebungi.

Mateo 12:20

Mushinga wa kimunyi awifitshi miishi: Mu mashibo ebungi, abaadi abafubisha bimunyi by’ema byabadi baushe mwimu wa olive bu malampi. Mushinga ndjo ubaadi aukaka mwimu bwashi kaalo katembe. Kishima kya mu kina Greke kyabadi baluule bu “mushinga awifitshi miishi” akilesha mushinga ukyawifitshi miishi munda, mwanda ka buto ka mushinga kakii kaalo, kadi ludimi lwa kaalo ndupwe kushima. Yeeshaya 42:3 baadi mutemukye pabitale lusa lwa Yesu shi; takashimi sunga ka lukulupilo kapeela kashale nako basha kwiyisha na batapikye ku mashimba.

Mateo 26:13

Binyibinyi: Kishima kya mu kina Greke a·menʹ kyabadi baate ku kishima a·menʹ kya mu kina Ebelu, akilesha shi “bikale nka byaba,” sunga shi “binyibinyi.” Yesu baadi akamba kufubisha kino kishima bwa kushinkamisha mwanda, mulayilo, sunga butemuki, na kushimika kasele shi mbyabinyibinyi na abilombana. Kipaso kibaadi Yesu mufubishe kishima “binyibinyi,” sunga amen, nkilekene na byabadi bekifubishe mu bifundwe byoso bi selele. Nsaa y’ekyalushena misusa ibidi shi (a·menʹ a·menʹ), bu byabidi mu Evanjile a Yowano, kino kishima kya Yesu akilesha “binyibinyi.”—Yo 1:51.

BIFWATULO NA MA VIDEO

Ma foto, bintu byabadi basole, ma video ashii na mayi na bifwatulo abisaana abipatuula myanda ya mu Bible.

Betfaje, Mwengye wa Olive na Yelusalema

Uno video mwipi alesha eshinda adyende ku Yelusalema dya ku lupese lwa kutunduka, kukatukila ku kibundi kya et-Tour ki kwanka lelo uno (abimweka shi pa kyakya kibundi ndjo pabaadi Betfaje a kala) na ku nsongo kwa Mwengye wa Olive. Betani baadi dya kutunduka kwa Betfaje, dya ku ngalala i ku lupese lwa kutunduka kwa Mwengye wa Olive. Pabaadi Yesu na balongi baye abende ku Yelusalema, abaadi na kyubishi kya kulala mu Betani, mwikale lelo uno kibundi kya el-ʽAzariyé (Al ʽEïzariya) eshina dya mu kina Arabe adilesha shi “Mbalo ya Lazare.” Kushi mpaka Yesu baadi afikila ku ba Maata, Mariya na Lazare. (Mat 21:17; Mak 11:11; Luk 21:37; Yo 11:1) Abimweka shi, pabaadi Yesu akatuka kwabo bwa kwenda ku Yelusalema, baadi alondo dino eshinda dyabalesha mu video. Pabaadi Yesu mukamine ku mpunda mwifuku dya 9 dya mweshi wa Nisana mu kipwa kya 33 B.B., kukatuka ku Mwengye wa Olive bwa kwenda ku Yelusalema, balondele nka dino eshinda, kukatuka ku Betfaje na ku Yelusalema.

Eshinda adikatuka ku Betani adyende ku Betfaje
Betfaje
Mwengye wa Olive
Ebanda dya Kedrone
Mwengye wa Ntempelo

Musumadi wi mu mufufwa wa kisuulu

Ino nyi foto yabadi bakwatuule ya mufufwa wa kisuulu kya muntu wabadi bakokole musumadi wi bula bwa 11.5 cm. Wawa mufufwa abaadi beupete mu 1968 kwi bantu abakimbuulaa myanda ya kala, kunundu kwa Yelusalema, na ngwa mu kipungo kya bena Looma. Autuusha kishinkamiisho shi, kala abaadi abafubisha misumadi i byabya bwa kwipa muntu pa kumukokola ku mutshi. Uno musumadi wi mumune na yaaya ibabadi bafubishe kwi basalayi ba bena Looma bwa kukokola Yesu Kidishitu ku mutshi. Wawa mufufwa mbeusangane mu kashete ka mabwe, kabetamina bu kashete ka mifufwa (ossuaire) mubabadi abele mifufwa ya muntu mufwe su bapu kunyanga bashala penda mifufwa. Bino abilesha shi muntu abadi bepe pa kumukokola ku mutshi, abaadi na kya kumushiika mu mashama.—Mat 27:35.