“Mpoolo baatumbwil’Efile Mukulu, eshimba nkumunyinga”

P’abadi kakongye ka mu Looma kapushe shi Mpoolo badi afiki, kisaka kya bakwetu kibayile lwendo lufikye ku bilometre 64 bwa nkamukuukila. Nkipaso kinyi kibadi kifulo kya kwipaana kikume Mpoolo kwishimba? “P’abebamwene, Mpoolo batumbwile Efile Mukulu, eshimba nkumunyinga.” (Bik 28:15) Sunga byekala shi Mpoolo badi aukibwa bwa kunyingisha tukongye tubadi akunku, bwa uno musango pabadi mu lukano, aye nyi ababadi abanyingisha.—2Kod 13:10.

Lelo uno bakunkushi ba bifunda bakwete abende mu kakongye na kakongye bwa kunyigisha bakwetu balume na bakashi. Anka bu bangi boso bafubi ba Yehowa, ingi nsaa abapusha kubofula, na twinyogoshi. Ungi musango aufiki mukunkushi akifunda na mukashi aye bwa kukunka kakongye kenu, kinyi kyodi mulombene kukita bwa kwi banyigisha, bwanudja “kwi kankamishena”?—Lom 1:11, 12.

• 

  Kwatshishena bisangilo bya mudimo wa bulungudi. Bakunkushi ba bifunda abanyigishibwa nsaa ayitatshisha balungudi bwa midimo yoso ya mu lumbingo lwa pa bwalo. (1Tes 1:2, 3; 2:20) Nangushena bwa kufuba bu balamashinda mukwashi mu mweshi wa nudi na mukunkushi akifunda. Okumina kufuba pamune na munkushi akifunda na mukashi aye mu bulungudi, sunga kwata umune a kwabadi bwa kwenda naye ku balongi bobe ba Bible su? Abasankilaa kufuba pamune na balungudi balekyene, mpa na bano abepusha bu bash’abalambukisha kalolo.

• 

  Ikala na kalolo. We mulombene kutusha mbalo ya kulala sunga kya kudya? Bino abilesha shi we mufule mukunkushi akifunda na mukashi aye. T’abakimbaa penda kwibakitshina myanda ikata nya.—Luk 10:38-42.

• 

  Teemesha na kufubila elango na buludiki bwaye. Mukunkushi a kifunda akuminaa kwitukwasha bwa tudya kumona bya kulongamisha mudimo wetu bwa Yehowa. Ingi nsaa, mulombene kwitupa elango aditukalakasha. (1Kod 5:1-5) Aditutwadila muulo nsaa ya twiditumikila na kwidikokyela.—Eb 13:17.

• 

  Ebaleshe lutumbu. Lungula mukunkushi a kifunda na mukashi aye bikwete kwinukwasha kwitatshisha kwabo. We kwibikita panudi bubidi sunga kumufundila mu mukada.—Kol 3:15.