Tuikale bashinkamishe’shi atukapashibua pabakabutula uno ndumbuluilo

Mu kapindi kapela’mu, luishinko lua Yehowa pabitale uno ndumbuluilo alufiki ku nfudiilo. Bipuilo bia madimi abikabutudibua, maumbo esangie aakaluisha muilo w’Efile Mukulu, na Yehowa akabutula bantu babi ku Armagedone. Bena Kidishitu abatengiela n’eshimba kuiyilu efuku adikalombana ino mianda i na muulo ukata.

Eyendo’shi, t’atuku mianda yoso ayikakitshika ku mpombo ikata. Bu kileshesho, t’atuwuku nsaa ayikabanga mpombo ikata. T’atuwuku tubingilo atukatusha bakata ba mbulamatadi bua kuluisha bipuilo. T’atuwuku bungi bua mafuku abakaluisha muilo w’Efile Mukulu kui miilo, na abikakitshika mianda. T’atuwuku mishindo ayikafubisha Yehowa bua kubutula bantu babi ku Armagedone.

Sunga biabia, Bifundue abitulungula mianda yoso yatudi nayo lukalo, bua’shi tuikale na lukulupilo na banyingie mashimba bua mianda ayifiki kumpala. Bu Kileshesho, atuwuku’shi tui ku nfudilo kua “mafuku a ku nfudiilo.” (2Tim 3:1) Atuwuku’shi mafuku a kuluisha bipuilo “abakeapeelesha” bua’shi tabaluishanga kipuilo kia binyibinyi. (Mat 24:22) Atuuku’shi Yehowa akapaasha muilo waye. (2Mp 2:9) Na atuwuku dingi’shi, Uno abadi basangule kui Yehowa bua nkayipaa bantu bebubi na kupaasha bantu bebuwa ku Armagedone, mmululame na e na bukome bui bungi.​—Kibaf 19:11, 15, 16.

Bantu “abakapono kipuuka” bua mianda ayikakitshika mu mafuku aafiki. Biabia, p’atunangushena ku mushindo ubaadi Yehowa mupaashe muilo waye kala, na mianda yadi muitufumbuile bua mafuku aafiki, tui balombene “kubanduluka na kwibwesha mitwe [yetu]” muanda kipandilo kietu takidi peepi.​—Luk 21:26, 28.