Nkonko ya bantu ababadikaa

Mayi e mu Mulungudi 5:7 aakwila penda bukunkushi bwa bana ba bantu, su aakwila na Yehowa?

Uno verse amba’shi: “Su . . . omono sha bulanda mupombeshwe, bwolokye na bululame bilwishwe, tobasukilanga kino kintu, mwanda, kuunundu kwa muntu mukata, akutalaa mungi mukata, dingi kuunundu kwabo, kwi bakata nyi.”​—Mul. 5:7.

Muyile mweneno a bantu, uno verse akwila penda bantu be na matalwa mu mbulamatadi. Anka su twanangushena ngofu pabitale ano mayi, aakwila dingi bya binyibinyi pabitale Yehowa, bino abitukankamika.

Mulungudi 5:7 akwila bakunkushi bakwete kukyengyesha balanda na nta balulame. Abitungu mukunkushi ooso atentekyeshe’shi, kuunundu kwaye kwi ungi mukunkushi e na matalwa kwete kumutala. Na nkulombene kwikala bangi be na matalwa kwibakila. Mwanda wa kinyongwa, mu mbulamatadi ya bana ba bantu, bano booso bakunkushi ta mbalulame nya, na mwilo ukwete kukyenga mwanda wa byabya.

Sunga bya mweka bu kushii lukulupilo, twi kunyingishibwa pa kwiuka’shi Yehowa kwete ‘kutala sunga bakata be kuunundu’ mu mbulamatadi ya bana ba bantu. Twibalombene kuteka Efile Mukulu bukwashi na kumusumbwila bushito bwetu. (Mis. 55:23; Fid. 4:6, 7) Atuuku’shi Yehowa “amonaa abikitshika mbalo yooso pa nsenga ishima bwa kunyingisha bano batuule lukulupilo lwabo mwadi.”​—2 Mya. 16:9.

Byabya, Mulungudi 5:7 etutentekyesha’shi mu nsenga mwatudi bashaale, mwi muntu e na matalwa kukila bangi. Anka mwanda wi na muulo, uno verse etutentekyesha’shi Yehowa nyi sha matalwa ooso. Binobino, kwete kukunkusha kubukwashi bwa Mwan’aye Yesu Kidishitu, Nfumu a Bufumu bwaye. Sha bukome booso kwete kutala bintu byooso na muntu ooso, mwanda aye na Mwan’aye mbalulame mu myanda yooso na ta be na ntondo.