Oukanga su?

Mu siekele a kumpala, mushindo kinyi ubaadi ba tshite muakuidi abakatusha mase ku kilambuilo kunyima kua kulambula nyema?

KIPUA kioso, ba tshite muakuidi ba mu Isalele abaadi abalambula nyema i bungi ku kilambuilo mu ntempelo. Ungi muina Yunda akimbuula mianda ya kala bafundileʼshi, muifuku dia Pasaka, abaadi abalambula mikooko ikile pa 250 000. Biabia ku kilambuilo kubaadi mase e bungi. (Lv. 1:10, 11; Mba. 28:16, 19) Abaadi abakitshi kinyi na aa mase?

Bena siyanse mbapete mbalo i pepi na ntempelo ababaadi bebakie kui Erode, ntempelo baadi kuanka mpa na mu mafuku a Yesu. Abaadi bapete kanale kabaadi akatuusha mase mu ntempelo.

Tala mianda ibidi ibaadi ayikuasha bua kulama kilambuilo kitookane:

• Meena abaadi muushi mua kilambuilo: Bena siyanse abashinkamishaʼshi, pepi na kilambuile abaadi babundule ma kanale bua kutuusha mase a milambu. Ungi mukanda wa kala awakuila miiya na bipikua bia bena Yunda ubabaadi bafunde ku mbangilo kua siekele a kasatu, aushinkamishaʼshi, kubaadi meena abidi ku lupese lumune lua kilambuilo. Uno mukanda aupatuulaʼshi mase na mema ababaadi abafubisha bua kusuula paashi pa kilambuilo, abaadi aakidila mu ano ma kanale mpa na Muibanda dia Kidrone.

  Mukanda wa kano kabidi awakuila mianda ya kala ya bena Yunda, aupatuulaʼshi bena siyanse mbapete ma kanale pepi na kilambuilo, ababaadi pangi abafubisha bua kukatusha mase na mema mu ntempelo.

• Mema e bungi: Ba tshite muakuidi abaadi na lukalo lua mema e bungi bua kusuula paashi pa kilambuilo mpa na kanale mu baadi amukidila mase. Bua kufuisha mema ku kilambuilo, abaadi bakite ma kanale, ma siterne, na mashiba. Biabia ba tshite muakuidi abaadi abaatshila mema paapa bua kukita uno mudimo wi na muulo. Ungi muina siayanse abetamina bu Joseph Patrich ambaʼshi: “Takubaadi ungi ntempelo e bino mu aa mafuku baadi na ma kanale abaadi aafuisha mema mu tempelo bua kusuula kilambuilo.”