Mukanda wa Kasaka ka Bakunkushi-Bakulu
Kwi bafubi netu ba mu nshibo:
Twi na muloo ukata wa kwinufundjila kuno ku mbangilo kwa kino kipwa! Kumpwilo kwa 2014, nfumu eetu Yesu Kidishitu alombasha bipwa lukama kasha abanga kumunana munkatshi mwa beshinkwanyi naye.—Mis. 110:1, 2.
Ku mbangilo kwa kino kipwa kya mudimo, kisangilo kya ku kipwa kya sosiete Watch Tower Bible and Tract Society of Pennsylvania, komite atalaa myanda ya kwaluula kwa Traduction du monde nouveau mmutuushe Bible mupya abadi bakituule ebuwa bukile abadi balombeene kupeta kwi bantu booso. Yehowa mmufube na bana baaye ba mu kikudi bwa kutuusha Traduction du monde nouveau. (Lom. 8:15, 16) Uno mwanda ndjo ubekasha uno Bible binyibinyi bu mwilekeene na ingi yooso, ta mbyobyo su?
Munda mwa bipwa bibungi, komite a bafundji a Kasaka ka Bakunkushi-Bakulu mmutuule Bible pa mbalo ya kumpala. Lelo uno, Traduction du monde nouveau mbapwe kumwaluula ooso mushima sunga kipindji mu ndjimi 121. Atwinusendeela bwa kuleesha Yehowa mushindo wanusangeela Bible anudi naaye. Pa kumubadika efuku dyooso na kunangusheena myanda i mwanka. Na dingi, anukyebe kwifubwila pepi na Yawa mumutuushe, Yehowa Efile Mukulu.—Ja. 4:8.
Twi na muloo ukile nsaa yatupusha bakwetu ba kifulo bakashi na balume abakambila nkalakasho yabakwete kufumankana nayo. Ingi nsaa, mbalombeene kukutwa mushindo wa kusanka na bakwabo. Bu kileshesho, mu mafuku ashaale, kingi kifuko kya mu Asie akikalanga kipete nkalakasho nsaa ayikalanga nyinabo mupete maladi a kufwa kwa bipindji bya mbidi. Mwanda wa kukanya, bantu abauku myanda ya ba munganga ngofu abaadi bakutwe mushindo wa kumupaasha. Mwanda wi kashaa! Binobino mulume akisha nsaa yooso pamune na mukashi aaye bwa kumulama. Mwana aabo mulume na babidi bakashi mbalekye kileshesho kibuwa kya bu beena Kidishitu p’abo kulesha kifulo na kukwasha baledi baabo. Kino kifuko kibuwa, pamune nanwe booso bakambile nkalakasho ilekeenelekeene, nkilombeene kupusha muloo autuukila mu kunyingiila mu kutompibwa kwa lukumiino lwenu. (Ja. 1:2-4) Yehowa ashinkamiisha bashingwe mwimu baaye na ingi mikooko shi abekala na muloo nsaa yabanyingiila mu makyenga, mwanda akebelela myabi na kwibapa kya buntu kya muwa wa looso!—Ja. 1:12.
Kipwa kishaale, mu Kitentekyesho kya lufu lwa Yesu Kidishitu atwikalanga bantu 19 241 252. Muloo kinyi wa kumona mushindo wi bungi bwa bantu abatumbisha Yehowa na Yesu Kidishitu p’abo kutwela mu kisangilo kikata kya mwilo wa Yehowa kya ku kipwa! Mu mafuku a Kitentekyesho, kibumbu kikata kya bantu akikalanga kitumbishe Yehowa p’abo kwata mudimo wa bu mbala-mashinda bakwashi mu mweshi wa Kasatu sunga wa Kananka. Mwanda wikashaa! Na twekeele musangale nsaa iboodi mupushe shi baaba abekalanga baate mudimo wa bu mbala-mashinda bakwashi mu mafuku afikile mukunkushi a kifunda mu kutala kakongye kaabo mbalombeene kwikala na muloo wa kutwela mu kisangilo kyooso kishima kyakitshi na ba mbala-mashinda, sunga ekala shi ta mufikye mu mweshi wa Kasatu sunga wa Kananka? Baaba basasakate mu kikudi abapusha kalolo muulo wa kushaala bapasukye mu mudimo wa bulungudi na mu midimo ya kakongye. Kwikala na bibungi bya kukita akwitukwasha bwa kushaala bemane na banyingye mu mushindo wa kutshokola bitompwanga bya Diabulu abikyebe kubofusha lukumiino lwetu na kwitupambusha.—1 Kod. 15:58.
Twi na muloo ukata wa kumona munda mwa kipwa kya mudimo kikile, bantu 277 344 abekalanga belambule patooka p’abo kubatshishibwa mu mema na binobino abatwele mwishinda dya muwa pamune na bakwabo be mu nsenga ishima! (Mat. 7:13, 14) Bano bantu bapya be na lukalo lwa bukwashi bwashi ‘banyingye . . . mu lukumiino.’ (Kol. 2:7) Tungunukayi na kwinyingisheena ku muntu na muntu mpa na ku nfudiilo. (Mat. 24:13) “Kankamikayi babofule ku mashimba, nyingishayi babofule, ikalaayi na lwishinko kwi booso.” (1 Tes. 5:14) Ku nfudiilo, abitungu ooso a kwatudi ‘atekye kushi kukôka,’ na kwamba shi: “Bufumu bwobe bufikye.”—1 Tes. 5:17, EEM; Mat. 6:10.
Sankilayi uno Annuaire, na nushinguule shi twi bafule muntu na muntu ooso a kwanudi anwe bafule Yehowa!
Mbeenu bakwenu,
Kasaka ka Bakunkushi-Bakulu ka Batemwe ba Yehowa