Nkonko Ya Bantu Ababadikaa

Mu kimonwa kya Esekyele, uno muntu e na lusaala lwa mufundi na bantu basamombo be na mamputu a kubutula nao, abaleesha kinyi?

Abaleesha makome a mwiyilu abaabadi bafubishe bwa kubutula Yeelusaleme, na abakafubu nao dingi bwa kubutula ndumbulwilo a Satana mulwile ku Armagedone. Uno nyi mpushisho mupya abatupete. Bwakinyi uno mpushisho e na muulo?

Kumpala kwa kipwa kya 607 K.B.B., Yehowa baadi muleeshe Esekyele kimonwa kya myanda ayikakitshika mu Yeelusaleme kumpala kwa kumubutula. Mu kyakya kimonwa, Esekyele bamwene myanda ibubi ayikakitshika mu Yeelusaleme. Kunyima bamwene bantu basamombo, na ooso a kwabadi baadi na ‘mputu ya kutuutana nayo.’ Bamwene mungi muntu baadi munkatshi mwabo baadi “mufwale bipekopeko” baadi na “kasàla ka mufundi.” (Esekyele 8:6-12; 9:2, 3) Babalungwile uno muntu bwadya kwifunya mu lupata na kwela “kitundwilo pa mpala ya bantu abeele mikanko na abeeyambila pa mwanda wa bubi booso abukitshika munkatshi mwalwo.” Kunyima babalungwile bantu basamombo be na ma mputu bwa kwipaa booso be mu kibundji bashii bedibwe kitampi. (Esekyele 9:4-7) Kino kimonwa nkilombeene kwitulongyesha kinyi, na uno muntu e na lusaala lwa mufundi aleesha muntu kinyi?

Esekyele bamwene kino kimonwa mu kipwa kya 612 K.B.B. Buno butemuki bubalombeene bwa musango wa kumpala kunyima kwa bipwa bitano nsaa ibaadi Yehowa mutadiile bwa’shi basalayi ba beena Babilone babutule Yeelusaleme. Bwa uno mususa, Yehowa baadi mufube na beena Babilone bwa kunyooka mwilo waye ubaadi ukutwe kukookyela. (Yeelemiya 25:9, 15-18) Kadi twi kwamba naminyi bwa beena Yuuda babaadi abenyongola bwa myanda yooso ibubi ibaadi ayikitshika mu kibundji? Yehowa baadi mwate mpàngo ya kwibapaasha.

Mu kimonwa, Esekyele tabaadi mwele muntu su ngumune kitampi sunga kutwela munkatshi mwa bantu ababutwile kibundji nya. Anka, ba mwikeyilu nyi babaadi abakunkusha kabutu ka Yeelusaleme. Byabya buno butemuki abwitupa mushindo wa kumona myanda ibakitshikile mwiyilu. Yehowa balungwile ba mwikeyilu baaye bwa kulumbuula kabutu ka bantu babi na kutaluula bwa’shi bantu balulame bapashibwe.a

Buno butemuki abukalombana dingi mu mafuku aafiki. Kumpala tubaadi atwamba’shi uno muntu e na lusaala lwa mufundi baadi aleesha bedibwe mwimu bakii na muwa pa nsenga. Tubaadi atwamba dingi’shi bantu bakwete kwedibwa kitampi kya kupashibwa nsaa yabateemesha na kukumiina mukandu wibuwa watulungula. Anka, mu mafuku ashaale twikeele bamone kalolo’shi abitungu tushintuule mpushisho eetu a buno butemuki. Mu mukanda wa Mateo 25:31-33 tulongyele’shi nka penda Yesu ngi e na matalwa a kutshibila bantu kiimu. Akakitshi bino mu mafuku aafiki ku mpombo ikata. Mu aa mafuku, bantu babakakisha ku lupese lwa mikooko abakapanda, na bantu baabakakisha ku lupese lwa mbushi abakabutudibwa.

Byabya, kino kimonwa kya Esekyele akitulongyesha kinyi? Akitulongyesha ino myanda itano:

1.  Kumpala kwa kabutu ka Yeelusaleme, Esekyele, Yeelemiya na Yeeshaya, babaadi abadimusha bantu pabitale mwanda aukakitshika mu kibundji. Babaadi nka bu ba ndami. Lelo uno, Yehowa kwete kufuba na kasaka kapeela ka bedibwe mwimu bwa kulongyesha mwilo waye na kudimusha bangi bantu kumpala kwa’shi mpombo ikata ibangye. Byabya, mwilo w’Efile Mukulu ooso, kwamba’shi be mu nshibo ya Kidishitu, bakwete kufuba uno mufubo wa kudimusha bantu.​—Mateo 24:45-47.

2.  Esekyele tabaadi mwele bantu abakapanda bitampi nya. Na bafubi b’Efile Mukulu namu lelo uno tabakwete kwela bantu bitampi nya. Bakwete nka penda kulungula bangi na kwibadimusha pabitale mwanda aukyebe kufika mu mafuku e kumpala. Uno mudimo wa kulungula bantu mu nsenga ishima ukwete kukitshika na bukwashi bwa ba mwikeyilu.—Kibafumbwilwe 14:6.

3.  Bantu babaadi bapande mu mafuku a Esekyele, tababaadi bediibwe bitampi abimweneka na meeso pa mapala aabo nya. Lelo uno namu baaba abakapanda tabakeedibwa bitampi abimweneka na meeso nya. Abitungu’shi bantu bakite kinyi bwa kupanda ku mpombo ikata? Nsaa yabapusha kudimusha, abitungu balongye bya kwambula Kidishitu, belambule’bo banabeene kwi Efile Mukulu, na bakwatshisheene bakwabo na Kidishitu ku mudimo wa kulungula mukandu wibuwa. (Mateo 25:35-40) Kunyima, mu mafuku a mpombo ikata, bano bantu abakapete kitundwilo, kwamba’shi abakasangudibwa bwa kupashibwa.

4.  Muntu e na lusaala aleesha Yesu. Mu mafuku a mpombo ikata, Yesu akeela bantu be mu kibumbu kikata bitampi nsaa y’ebakisha ku lupese lwa mikooko. Kunyima bakapete mushindo wa kushala mu mpaladiiso pa nsenga bwa looso.​—Mateo 25:34, 46.b

5.  Lelo uno bano bantu basamombo be na ma mputu a kubutula nao abaleesha basalayi ba mwiyilu babakwete kukunkusha kwi Yesu. Tabadi peepi na kufika mu kubutula bantu babi ba mu miilo yooso na kufudiisha buntomboshi.​—Esekyele 10:2, 6, 7; Kibafumbwilwe 19:11-21.

Ino myanda ibatulongo mu kino kimonwa ayitukwasha bwa kwikala bashinkamishe’shi Yehowa takabutula bantu balulame nsaa yakabutula bantu babi nya. (2 Mpyeele 2:9; 3:9) Ino myanda ayitulongyesha dingi’shi mudimo wa kulungula mukandu wibuwa wi na muulo ukata mu kino kipungo kyatudi. Abitungu’shi muntu ooso apushe kuno kudimusha kumpala kwa’shi nfudiilo ifikye!​—Mateo 24:14.