Kulonga kwa kufubanga ngofu kwi bu kukita kalashishi; akukukwasha lelo uno mpa na mu mafuku e kumpala
BWA BA NSONGWA
11 Katshintshi
AKALESHA KINYI
Bantu basha katshintshi tabatshinaa mudimo. Anka, abakuminaa kufuba ngofu bwa kukumbasha nkalo yaabo na bwa kukwasha bangi—sunga mudimo wabakitshi taukamba kwibasankisha.
BWAKINYI KE NA MUULO
Nshalelo mmuule na mashito, sunga byekala shi twe mwibikumiine. Mumo mu nsenga muule bantu bashy’abakumiina kukita midimo i bukopo, kwikala na katshintshi akukupa muulo ukata.—Mulungudi 3:13.
“Ne mulongye shi pofubu ngofu, wepusha bu’be ena muulo na wekala na muloo mwishimba. Kupusha kwa uno muloo mwishimba nkunkwashe bwa kufula mudimo. Kukita kwa mudimo na kulonda byooso bitekibwe akukwasha dingi bwa kwikala na nkumo ibuwa.”—Reyon.
EYI BYA KULONDA DYA MU BIBLE: “Mifubo yoso aitandâ kamweno.”—Nkindji 14:23, EEM.
KYODY’A KUKITA
Peta mweneno ebuwa a mudimo pa kulonda ino myanda ayilondo.
Peta kineemo kya kulonga bya kukita myanda kalolo. Sunga wekala okitshi midimo ya mu nshibo, kukita devoirs yabakupa ku kalasa bwa kukita ku nshibo, sunga kukita ingi midimo, etweshe obe ooso mushima mu mudimo okitshi. Su bomono shi we kukita mudimo kampanda kalolo, etatshishe bwa kulongamisha dingi—bwa kwiukita bukidi na bikile buwa. Popete mayele ebungi a kukita mudimo, wekala na muloo wa kwiukita.
EYI DYA KULONDA DYA MU BIBLE: “Su omona muntu sha bukalabwino bwa kufuba, weûkye’shi, akafubila banfumu.”—Nkindji 22:29, EEM.
Tala kula. Mu byooso byokitshi, posemuna mashito oobe kalolo, okwasha bangi. Bu kileshesho, poodi na katshintshi bwa kukita midimo ya ku nshibo, okasha bungi bushito kwi bangi mu kifuko.
EYI DYA KULONDA DYA MU BIBLE: “Mwabi wakupâna ngukile wa kupêbwa.”—Bikitshino 20:35, EEM.
Tofudiilanga penda ku kyabakutekye. Pamutwe pa kufudiila penda pa mulongo wabadi bakutshibile, etatshishe bwa kukita kukila kyabadi bakutungye. Kukita byabya, obe okunkusha muwa obe—okitshi kukila, kushi penda mwanda abakutekye, kadi mwanda bwata kitshibilo kya kwibikita.—Mateo 5:41.
EYI DYA KULONDA DYA MU BIBLE: “Biokitshi tabiikalanga bu bakukitshishe pa bukopo.”—Filemone 14, Kilombeno kipya 2014.
Ikala na nkatshinkatshi. Basha katshintshi ta be na lulengu nya, na dingi tabe bu abafubu kushi kwikisha nya. Be na nkatshinkatshi, be na muloo mu mudimo wabo, na abapete nsaa ya kwikisha.
EYI DYA KULONDA DYA MU BIBLE: “Bibuuwa bwa mpuki y’eyaasa yuule na diikisha pee masa abidi a mufubo, a kubinga kwa lupapi.”—Mulungudi 4:6.