12 Bipatshila

AYILESHA KINYI

Kipatshila ta mpenda bu kilotwa nya​—nkintu kyokulupila shi akikitshika. Bwa kwata bipatshila bibuwa abitungu kulumbuula myanda, kukumiina kushintuula ingi, na kukita mudimo wibuwa, wibuko.

Bipatshila mbilombeene kwikala ya kipungo kipeela (ayata mafuku sunga mbingo bwa kwiyikumbasha), ya kipungo ki munkatshi (myeshi), na ya kipungo kila (kipwa sunga kukila). Bipatshila bya kipungo kila mbiikumbeene kukumbashibwa pa kukumbasha kwa bipatshila bilekeene bya bipungo bipeela.

BWAKINYI I NA MUULO

Kukumbasha kwa bipatshila byooso akutamisha lukulupilo lwetudila, akunyingisha bukuuku na bangi, na kutamisha muloo oobe.

Kwikulupila: Pwata bipatsila bipeela na kwibikumbasha, okulupila shi obesha kwata Bipatshila bikile bukata. Wekala dingi mukankamane pofumankana na nkalakashi ya kwifuku n’efuku​—bu kileshesho kukambila bitompwanga bya bakuuku.

Bukuuku na bangi: Bantu abakuminaa kwikala pamune bantu abekalaa na Bipatshila kampanda​—twambe shi, bano abauku kyabakyebe na abatumika bwa kwikikumbasha. Byabya, mushindo ukile buwa wa kunyingisha bukuuku na muntu nyi nkutumika pamune bwa kukumbasha mbango imune.

Muloo: Pwata bipatshila na kwibikumbasha, opusha shi we na ngobesha.

“Ne mufule kukumbasha kwa bipatshila. Abinkwasha bwashi ngikale nsaa yooso na kya kukita na ayimpa kintu kya kutungunuka na kutumikila. Na nsaa yokumbasha bipatshila kampanda, opusha muloo wa kutala kumongo na kwamba shi, ‘Oolo, nebikitshi byabya! Nobesha kukita byangikeele mutshibe.’”​—Christopher.

EYI DYA KULONDA DYA MU BIBLE: “Atala lupapi taamyaaminaa, atala makumbi tawumbulaa.”​—Mulungudi 11:4.

KYODY’A KUKITA

Kita ino myanda bwa kwata bipatshila na kwibilombasha.

Kufumbula bipatshila. Kita liste a bipatshila byoodya kwata, webifunde mu mulongo muyile muulo wabyo​—osangule byaaya byokumina kukumbasha kumpala, kya kabidi, kya kasatu, nka byabya.

Ata mpango. Bwa bipatshila byooso, kita bino:

• Tshiba nsaa sunga efuku dyobesha kukumbasha.

• Tshiba ingi myanda ayitungu kukita.

• Pwandikisha nkalakashi ikumbeene kutuuka, na mushingo odya kwiyikambila.

Tumika. Toyindilanga na apalombana ka mwanda kooso bodya kubanga kufuba. Ayele luno lukonko, ‘Nkintu kinyi kya kumpala kyandya kukita bwa kukumbasha bipatshila yande?’ Akupu wekikite. Funda byooso byokitshi popudisha ka mwanda kooso.

EYI DYA KULONDA DYA MU BIBLE: “Byooso abipwandjikisha muntu ee na kisumi abikumbana.”​—Nkindji 21:5.