Mwanda wa 15

Mukashi a Loota batala kumongo

LOOTA na kifuko kyaye abaadi bashaale na Abrahame mu eumbo dya Kanaana. Dingi efuku Abrahame balungwile Loota shi: ‘Pano tapee eumbo dilombeene twashaala pamune kalolo na nyema yetu yooso nya. Elekeene nami. Su bwende mbalo kampanda, ami nende ku lungi lupese.’

Loota nkutala nsenga ishima. Aye nkumona ma mbalo ebuwa abaadi na mema na lubishi lwibungi bwa nyema yaaye. Mu Eumbo dya Yoordano. Loota nkwata kifuko kyaye na nyema yaye abo nkwenda kwakwa. Ku nfudiilo abo nkushala mu kibundi kya Sodome.

Bantu ba mu Sodome abaadi bubi ngofu. Loota baadi mwinyogole mwanda aye baadi muntu ebuwa. Efile Mukulu namu baadi mwinyongole. Kunyima, Efile Mukulu batumine miikeyilu ibidi bwa kudimusha Loota shi akyebe kubutula kibundi kya Sodome na kibundi kya Gomore kibaadi pepi nakyo mwanda wa bubi bwabyo.

Miikeyilu ibalungwile Loota shi: ‘Kita bukidi! Ata mwina-kwobe na baana boobe bakashi babidi nukatukye pano!’ Loota na kifuko kyaaye abaadi abanyengakana, ndjo miikeyilu nkwibakaka ku maasa na kwibatusha mu kibundi. Akupu mwikeyilu umune bambile shi: ‘Suukayi, wipadi ngwa muwa wenu! Tanutalanga kumongo kwenu. Suukilayi ku myengye tala nwashimina.’

Loota na baana baaye bakashi abakokyele abo nkusuuka kula na Sodome. Tababaadi bemane ata bwa kapindji kapeela sunga kutala kumongo. Kadi mukashi a Loota tabakokyeele nya. Abo abapu kwenda kula na Sodome, bayimene aye nkutala kumongo. Yaya nsaa mukashi a Loota nkwaluluka bu ebwe dya mungwa. Okwete kumumona mu kifwatulo su?

Uno mwanda wi kwitupa elango dikata. Abitulesha shi Efile Mukulu apashaa baba abamukokyela, kadi booso basha bamukokyela abakashimisha muwa wabo.

Kibangilo 13:5-13; 18:20-33; 19:1-29; Luuka 17:28-32; 2 Mpyeele 2:6-8.