Mwanda wa 22
Abeele Yoosefe mu lukano
YOOSEFE enka penda na bipwa 17 pababayile naaye mu Ejiipitu. Kwakwa abamupanyine kwi Potifare. Potifare baadi afubu kwa nfumu a mu Ejiipitu, abaabadi abetamina bu Faraone.
Yoosefe baadi afubu ngofu kwa mukata aaye, Potifare. Byabya, nsaa ibakudile Yoosefe, Potifare baamutudile bwashi ekale akukunkusha mifubo ya mu nshibo yaaye. Kadi bwakinyi dingi Yoosefe e mu luno lukano? Mpa mwanda wa mukashi a Potifare.
Yoosefe baadi akulu amweneka nsongwalume ebuwa bwa mpala, na mukashi a Potifare baadi na lukalo lwashi alale naaye. Kadi Yoosefe baadi muukye shi kukita byabya kwi bubi, aye nkupela. Mukashi a Potifare baadi mufite munda ngofu. Byabya, pabalukiile mulume aaye ku nshibo, bamudimbile aye nkwamba shi: ‘Yawa Yoosefe muntu ebubi Mmufikye kwandi bwa kulala naami!’ Potifare bakuminyine kibamulungwile mukashi aaye, aye nkufitshila Yoosefe munda ngofu. Ndjo aye nkumwela mu lukano.
Muntu baadi kapita ka lukano bamwene shi Yoosefe muntu ebuwa. Aye nkumutuula kunundu kwa beena lukano booso. Kunyima, Faraone nkufitshila mwedi aaye a malofu na nkitshishi a mikate munda, aye nkwibeela mu lukano. Dingi efuku, muntu na muntu nkupeta kyaye kilotwa, kadi tababaadi abauku kwibipatuula. Pabubatokyele, Yoosefe nkwi balungula shi: ‘Ndondeleeyi bilotwa byenu.’ Pababamulondeele, Yoosefe ku bukwashi bw’Efile Mukulu, bebapatulwile bilotwa byabo.
Yoosefe balungwile mwedi mukata a malofu shi: ‘Mu mafuku asatu okyebe kutuuka mu lukano na Faraone akakutulu ku mbalo ya mwedi mukata a malofu iboodi nayo kumpala.’ Yoosefe nkumulungula dingi shi: ‘Su botuuku, ongakwile kwi Faraone na onkwashe pa kuntushisha mu ino nshibo.’ Kadi, Yoosefe balungwile nkitshishi a mikate shi: ‘Mu mafuku asatu Faraone naamu akakutshibi mutwe.’
Mu mafuku asatu bibakitshikile nka bu bibakwile Yoosefe. Faraone batshibile mutwe wa nkitshishi a mikate. Kadi mwedi mukata a malofu, batuukile mu lukano aye kwaluka dingi ku mufubo wa nfumu. Kadi mwedi mukata a malofu tabatentekyeshe Yoosefe nya! Tabaadi mulungule Faraone mwanda waaye nya, na Yoosefe bashadile mu lukano.