Mwanda wa 26

Yoobo baadi mulamate kwi Efile Mukulu

OKWETE kupusha uno muntu kwete kukumba lusa su? Eshina dyaaye nyi Yoobo na mukashi e pano nyi mukashi aaye. Ouku kyakwete kulungula Yoobo su? ‘Tombokyel’Efile Mukulu owukye kwinyi kufwa.’ Tubande kutala bwakinyi mukumbeene kwakula mwanda wi byabya na bwakinyi Yoobo baadi mukumbe ngofu.

Yoobo baadi muntu mululame, baakokyelanga Efile Mukulu. Baadi mushaale mu nsenga ya Use pepi na Kanaana. Yehowa baadi mufule Yoobo ngofu, kadi kubaadi muntu baadi mumushikwe. Ouku yawa muntu su?

Yawa muntu baadi Satana Diabulu. Tentekyesha shi, Satana nyi mwikeyilu ebubi mushikwe Yehowa. Baadi na mushindo wa kutakula Adame na Eeva bwashi bapele kukokyela Yehowa, na baadi eele binangu shi mulombeene dingi kutakula muntu ooso bwashi apele kukokyela Yehowa. Kadi baadi na bukome bwa kwibikita su? Nya. Banda kwela binangu pabitale myanda ya bantu balume na bakashi batudi balongye baasha kululama. Ouku mashina a bantu bungi kinyi?

Kunyima kwa lufu lwa Yaakobo na Yoosefe mu Ejiipitu, Yoobo baadi muntu umune baadi mulamate Yehowa ngofu mu nsenga ishima. Yehowa baadi mukumiine kutadiila Satana bwashi aukye shi te na mushindo wadya kutakula muntu ooso bwashi akite bubi, aye nkwakula shi: ‘Tala Yoobo. Tala mushindo waadi mululame ku meso kwande.’

Satana balulwile shi: ‘Mmululame, mwanda we mumulame mu lupango aye na nshibo yaaye na bintu bibuwa byaaye byooso. Kadi su bomwata bino bintu byooso akutshipi.’

Ndjo Yehowa nkwamba shi: ‘Takwi mwanda. Ebyate byooso. Mukite kyooso kyokumiina. Atukyebe kumona su antombokyela. Anka tomukumang’aye nabeene nya.’

Kya ku mpala, Satana batumine bantu bwashi bayibe ngombe na tubalo na shamo ya Yoobo na kwipaa mikooko yaaye. Akupu aye nkwipaa baana baaye 10 balume na bakashi ku kipapi kikata. Kunyima, Satana beele Yoobo mukumbo wibukopo. Yoobo bakyengele ngofu. Nyi bwakinyi mukashi a Yoobo bakwile shi: ‘Tombokyl’Efile Mukulu, owukye kwinyi kufwa.’ Kadi Yoobo tabaadi mukumbeene kukita byabya nya. Akupu bakuuku baaye bebubi basatu abo nkufika mu kumulungula shi baadi na nshalelo ebubi. Kadi Yoobo baadi mushaale mululame.

Bino bibaadi bisangashe Yehowa ngofu, kumongo beleele Yoobo mwabi, nka bu byokwete kwibimona mu kifwatulo. Baadi mumupashe ku mukumbo waaye. Yoobo baadi na baana bakashi 10 bebuwa na aye nkumwalwisha misusa ibidi ngombe ibungi na mikooko na shamo kukila ibaadi nayo kumpala.

We mulombeene kulamata Yehowa bu Yoobo su? Su bomulamata, Efile Mukulu akakwelela naamu myabi. Okapete mushindo wa kupeta muwa nsaa ayikekala nsenga ishima ilumbulukye bu bibaadi lupango lwa Edene.

Yoobo 1:1-22; 2:1-13; 42:10-17.