Mwanda wa 31

Moyiise na Aarone abemonena na Faraone

PABALUKIILE Moyiise ku Ejiipitu, balungwiile mukwabo Aarone pabitale bipaso byooso. Na dingi nsaa ibalesheshe Moyiise na Aarone bipaso kwi beena Isaleele, mwilo ushima ubakuminyine shi Yehowa baadi naabo.

Paapa Moyiise na Aarone abayile mu kwimonena na Faraone. Abamulungwile shi: ‘Yehowa Efile Mukulu a Isaleele bamba shi: “Leka mwilo wande wende munda mwa mafuku asatu bwa kukita nteko mu kabaaka, bwa kundangwila.”’ Kadi Faraone nkwalula shi: ‘Ntanguuku Yehowa nya. Na dingi ntankyebe kuleka Isaleele ende nya.’

Faraone bafiitshile munda, mwanda beena Isaleele abaadi abakumina kuleka mudimo bwa nkalangwila Yehowa. Byabya aye nkwibafubisha dingi ngofu kukila. Beena Isaleele abatopekyele Moyiise mwanda wa mushindo ubabekyengyeshe, nyi Moyiise nkwinyongola bikata. Kadi Yehowa bamulungwile bwashi tekalakashanga. Yehowa bambile shi: ‘Ku bukome bw’eyasa dyande, Faraone akyebe kuleka mwilo wande wende.’

Moyiise na Aarone abayile dingi kwi Faraone. Uno mususa abakitshine kipaso. Aarone belele mukombo waye paashi awo nkwaluluka nyoka mukata. Kadi basha malenganyi ba Faraone abelele yaabo mikombo paashi, abo nkutuusha yaabo nyoka. Kadi, tala! Nyoka a Aarone kwete kudya nyoka ya basha malenganyi. Sunga mbyabya Faraone tabaadi mukumiine kuleka beena Isaleele bwashi bende nya.

Binobino nsaa ibalombeene bwashi Yehowa aleshe Faraone bukome bwaye. Ouku kibaadi mukite? Batumine bipupa 10, sunga mpombo ikata mu Ejiipitu.

Kunyima kwa bipupa bibungi, Faraone baadi ayitanyisha Moyiise na amulungula shi: ‘Imika kipupa, nankyebe kuleka Isaleele ende.’ Kadi su kipupa kibayimana, ashintuula binangu. Apele kuleka mwilo bwashi wende. Kadi, kunyima kwa kipupa ky’ekumi, Faraone bafikile mu kulekyela beena Isaleele bwashi bende.

Ouku byooso bipupa 10 su? Twibitale mwisaki adilondo.

Efilu 4:27-31; 5:1-23; 6:1-13, 26-30; 7:1-13.