Mwanda wa 37

Nshibo y’epema bwa kulangwila

OUKU ino nshibo su? Nyi nshibo y’epema bwa kulangwila Yehowa. Abeyitamina dingi bu tabernakele. Mwilo ubaadi wiyibakye abo abaapu kutuuka mu Ejiipitu. Ouku bebapeele binangu bya kwiyibaka su?

Yehowa ndyo batushile byabya binangu. Pabaadi Moyiise ku Mwengye wa Sinayi, Yehowa bamulungwile bwashi eyibakye. Bambile shi beyikite mu mushindo ubofule bwa kupanguula bipindji byayo. Byabya, abaadi balombeene kutwala bipindji byayo na kwibilungakasha dimo ingi mbalo. Pabaadi beena Isaleele abatentuluka ku ingi mbalo ya mu kabaaka, abaadi abende na nshibo y’epema.

Su botala mu kadimbo ke ku nsongo kwa nshibo, okyebe kumona musheete. Abewitamina bu musheete wa kilombeno. Ubaadi na miikeyilu ibidi sunga ba kelubime babidi ba oòlò, umune ku nsongo ungi ku ingi nsongo ya musheete. Efile Mukulu bafundile dingi Miiya Ekumi ku mpelwa ibidi ya mabwe, mwanda Moyiise baadi mutanye yaaya ya kumpala. Na ano mabwe abaadi bealame mu musheete wa kilombeno. Kubaadi dingi kipulu kya maana mwanka. Okyotentekyesha maana su?

Aarone mukwabo na Moyiise ndyo ababaadi basangule kwi Yehowa bwa kwikala bu tshite-mwakwidi e panundu. Baadi akunkusha mwilo bwa kulangwila Yehowa. Baana baaye abaadi dingi ba tshiite-bakwidi.

Binobino banda kutala kano kadimbo kakata ke mu nshibo. Nkakile kadimbo kapeela misusa ibidi. Bomono kasheete na miishi ikwete kutuuka mwanka su? Kino nkilambwilo; ndyo mubaadi batshiite-mwakwidi abashiiki kabanda. Akupu tala kitudilo kya malampi ki na malampi musambobidi. Kintu kya kasatu ki mu nshibo nyi mmesa. Kwakwa abaadi abekutuulu mikate 12.

Mu lupango lwa tabernakele mwi mbaafu muwule mema. Batshite-mwakwidi abaadi abetumpu aa mema. Kwi dimo kilambwilo kikata. Kwakwa nyi kubabadi abashiiki nyema bwa kwiyilambula Yehowa. Nshibo y’epema bwa kulangwila ibaadi munkatshi mwa lupango. Beena Isaleele abaadi bashaale mu twabo tushibo twa mapema beyifunyishe.

Efilu 25:8-40; 26:1-37; 27:1-8; 28:1; 30:1-10, 17-21; 34:1, 2; Beena-Ebreeyi 9:1-5.