Mwanda wa 47
Ngifi mu Isaleele
BANDA kutala kikwete kushiika uno muntu mu nshibo yaaye! Kikotshi kibuwa na mulungo wa oòlò na bingi bintu bya kyamo ky’ebakanyi. Mwibyate mu lupata lwa Yeeriko. Kadi nkinyi kibaadi akitungu kukita na bintu bya mu Yeeriko? Otentekyesha su?
Bibaadi abitungu kwibilwisha, kadi oòlò na kyamo ky’ebakanyi bibaadi abitungu kwibitwala mu tabernakele a Yehowa. Byabya, bano bantu abalwishisha Efile Mukulu. Abayibi bintu by’Efile Mukulu. Eshina dya uno mwana mulume nyi Akane. Bano baadi nabo mbantu ba mu nshibo yaaye. Tubande kutala kibaadi kikitshikye.
Kunyima kwa Akane kwiba bintu, Yooshwa batumine bantu mu kulwa na lupata lwa Ayii. Kadi abaadi bebatshokole. Bangi abebayipayile na bangi namu babasuukile. Yooshwa nkwinyongola ngofu. Aye nkulala kiuba mu nsenga na nkwela luteko kwi Yehowa bino shi: ‘Bwakinyi bokumina shi bino bitukitshikile?’
Yehowa balulwile bino shi: ‘Ebwee! Isaleele mulwishe. Mbaate bingi bintu bibaadi abitungu kulwisha sunga kutwala mu tabernakele a Yehowa. Mbayibe kikotshi kibuwa na mbekifye. Ntangikala nenu nya su tanwibakashe munkatshi mwenu bino bintu na na yawa mwibyate.’ Yehowa bambile shi akyebe kulesha Yooshwa yawa muntu ebubi mwibyate.
Ndyo Yooshwa nkubunga mwilo ooso pamune na Yehowa nkusangula yawa muntu ebubi Akane. Akane bambile shi: ‘Eyendo ami nyi mulwishe. Naadi mumone kikotshi kibuwa bukile, mulungo wa oòlò na bintu bya kyamo ky’ebakanyi. Naadi mwibilakile ngofu ndyo ami nkwibyata. Mbyabya bishikiibwe mu nsenga munkatshi a nshibo yande.’
Pababapetele bino bintu abebitwadile kwi Yooshwa. Aye nkulungula Akane shi: ‘Bwakinyi wemwitutwadile malwa? Yehowa akunyokye mu dino efuku!’ Paapa mwilo ooso ubaashile Akane na kifuko kyaaye mabwe abo nkufwa. Byabya abilesha shi tabitungu ata efuku dimune kwata kintu kishi kyetu nya.
Kunyima kwa byabya beena Isaleele abayile dingi mu kulwa na lupata lwa Ayii. Mu dyaya efuku Yehowa bakwashile mwilo waaye na abo nkutshokola.