Mwanda wa 51
Luuta na Naomi
MU BIBLE mwi mukanda wabetamina bu wa Luuta. Awisambila mwanda wa kifuko kimune kibaadi mu kipungo kya bansushi mu Isaleele. Luuta nyi mukashi mukinga a mu nsenga ya Moabe; ta nga mu Isaleele, mwilo w’Efile Mukulu nya. Kadi Luuta pabalongyele pabitale Yehowa Efile Mukulu, aye nkubanga kumufula ngofu. Naomi nyi mukashi mukulu baadi mukwashe Luuta bwashi alongye pabitale Yehowa.
Naomi nyi mmukashi mwina Isaleele. Aye na mulume aaye abayile mu kushala mu nsenga ya Moabe mu mafuku abaadi kipupa kya nsala mu Isaleele. Byabya dingi efuku, mulume a Naomi bafwile. Kunyima baana balume babidi ba Naomi abayibakiile baana bakashi babidi ba mu Moabe abetaminwa bu Luuta na Opa. Kadi kunyima kwa bipwa 10, baana balume babidi ba Naomi abafwile. Naomi na bano baana bakashi abaadi na bushiye bukile! Binobino Naomi akitshi kinyi?
Dingi efuku Naomi batshile kitshibilo kya kukita lwendo lula bwa kwaluka ku mwilo waaye. Luuta na Opa abaadi na lukalo lwa kushaala naaye ndjo abo nkutwela naaye mwishinda. Kadi kunyima kwabo kutambuka mwishinda kapindji, Naomi bealulwile kwi baana bakashi aye nkwibalungula shi: ‘Alukilayi muntu ooso kwi nyinaaye.’
Naomi bebakamiine kiipa bwa kwibaladika. Yaya nsaa abo nkubanga kudila, mwanda abaadi bafule Naomi ngofu. Abo nkwamba shi: ‘Nya! Atukumina kwenda noobe mwiumbo dyenu.’ Kadi Naomi balulwile shi: ‘Alukilayi baana bande. Bibuwa bwashi nwalukye kwenu.’ Byabya Opa balukiile kwabo. Kadi Luuta tabalukiile nya.
Naomi bealulwile kwadi aye nkumulungula shi: ‘Opa baapu kwenda. Obe naamu londa mukwenu.’ Kadi Luuta bamwalulwile shi: ‘Tonsuusakashanga bwankuleka! Ntadiile nyende noobe. Kooso kwende nende noobe, kooso koshaala nashaala. Mwilo oobe awikala mwilo wande, Efile oobe Efile ande. Kooso kofwila nafwila, dingi nekushiikiibwa.’ Pabakwile Luuta bino, Naomi balekyele kumulungula dingi bwashi alukiile kwabo.
Kunyima kwa byabya, bano bakashi babidi abakafikile mu Isaleele. Abo nkushaala kwakwa. Luuta bayiile mu kufuba mwifuba, mwanda abaadi mu mafuku a kuumbula ntete ya bukula. Mulume umune abetamina bu Boaze baadi mumutadiile bwashi aumbule mwifuba dyaaye. Ouku nyinaaye na Boaze su? Nyinaaye baadi Rakabe a mwiumbo dya Yeeriko.
Dingi efuku Boaze balungwile Luuta shi: ‘Mbandondele byooso byodi mukitshine Naomi. Nawuku byoodi mulekye nshoobe na nyinoobe na eumbo dyabadi bakutande bwa kwenda kwi mwilo oshowukanga kubanga kala. Yehowa akufute byooso byoodi mukite!’
Luuta balulwile shi: ‘Bontala kalolo mukata. Bonsamba, bwesamba naami kalolo.’ Boaze baadi mufule Luuta ngofu, na dingi kunyima a mafuku apeela bamwibakiile. Naomi baadi na muloo wikashaa! Kadi muloo waye ubaadi ukile bukata nsaa ibatandile Luuta na Boaze mwana aabo a kumpala, abetamina bu Obede. Kunyima Obede bekeele nshaaye kulu na Daavide, atukyebe kulonga bibungi pabitale Daavide mu bipindji bi kumpala.