Mwanda wa 60
Abigaile na Daavide
OUKU uno mukashi ebuwa kwete kufika mu kufumanka na Daavide su? Eshina dyaaye Abigaile. E na binangu bibuwa, na bakwasha Daavide bwashi takitanga kintu kibubi. Kadi kumpala kwashi tulongye byanka, tubande kutala kibaadi kikitshikile Daavide.
Kunyima kwaaye kusuuka Saule, Daavide bayile mu kufwama mu lubwebwe. Batuutu baaye na bangi bakwabo ba mu kifuko abamulondele. Balume pepi na 400 abafikile kwadi, na Daavide nkubanga kwibakunkusha. Akupu Daavide bayile kwi nfumu a Moabe aye nkumulungula shi: ‘Kumiina shi nshaami na nyinaami bafikye mu kushala kwanudi mpa na pangukila akinkitshikila.’ Papa Daavide na bantu baaye ababangile kufwama mu myengye.
Kunyima kwa byabya, Daavide bafumankeene na Abigaile. Mulume aaye Nabale baadi na mafuba akata. Baadi na mikooko 3 000 na mbushi 1 000. Nabale baadi muntu ebubi. Kadi mukashi aaye Abigaile baadi buuwa ngofu. Na dingi baadi auku kukita myanda ibuwa. Ungi musango baadi mupaashe kifuko kyaaye. Tubande kutala bibakitshine.
Daavide na bantu baaye abaadi bakitshine Nabale kalolo. Abaadi bamukwashe bwa kulama mikooko yaaye. Byabya dingi efuku Daavide batumine bantu baaye bwa kuteka Nabale bukwashi. Bantu ba Daavide abafikile kwa Nabale nsaa ibaadi bafubi baaye bakwete kukuula bwaa bwa mikooko. Dibaadi efuku dya feete, Nabale baadi na bya kudya bibungi bibuwa. Byabya bantu ba Daavide abambile shi: ‘Twi bakitshine bafubi boobe kalolo. Tatwi bayibe mukooko obe su ngumune, kadi twi bebakwashe bwa kwiyilama. Byabya, etupe namu ndambo ya bya kudya.’
Nabale bambile shi: ‘Ntshi mukumbeene kupa bya kudya byande kwi bantu bu anwe nya.’ Bakwile bu ebasengye, na dingi bambile Daavide bishima bibubi. Pabalukiile bantu ba Daavide mu kumulungula yaya myanda, Daavide bafitshile munda ngofu. Balungwile bantu baaye shi: ‘Ooso muntu aate mwele waye!’ Abo nkutwela mwishinda bwa nkayipa Nabale na bantu baaye.
Umune a ku bafubi ba Nabale, bapushishe bishima bibaadi byakule Nabale, balungwile Abigaile kibakitshikile. Paapa Abigaile balumbulwile bya kudya. Bebitentekyele ku mpunda aaye, aye nkutwela mwishinda. Pabafumankeene na Daavide, bemikile mpunda, nkukunama nkwamba shi: ‘Nakusendeela, toteemeshanga mulum’ande Nabale. Ayitaminwa bu kitesha, dingi butesha mbumulamate. Bino bya buntu, kumiina kwibyata, na kwitufwila lusa bwa byooso bikitshikye.’
Daavide balulwile shi: ‘We mukashi sha binangu. Bonkwasha bwashi ntshi ipanga Nabaale pa mwanda wa bwakulakule bwaye. Alukiila koobe mu butaale.’ Akupu, pabafwile Nabale, Abigaile bafikile mukashi a Daavide.