Mwanda wa 62

Bubi bubatwele mu nshibo ya Daavide

PABATSHILE Daavide bufumu ku Yeelusaleme, Yehowa bapeele beena ngoshi baaye bukome bwa kutshokola beshikwanyi baabo booso. Yehowa balayile beena Isaleele bwa kwibapa nsenga ya Kanaana. Kadi binobino, ku bukwashi bwa Yehowa, abaatshile maumbo ooso abaadi mwibalee.

Daavide nfumu ebuwa. Mufule Yehowa. Byabya kintu kya kumpala kibakitshine aye baapu kukwata eumbo dya Yeelusaleme, nkutwala kwa musheete wa kilombeno bwashi ufikye mu Yeelusaleme. Na akumina kwibaka ntempelo bwa kwiutuula mwanka.

Nsaa ibaadi Daavide ende na kununupa, bakitshine bubi bukata. Daavide auku shi bibubi kwata kintu kya beene. Kadi dingi efuku ku kyoolwa, nsaa yaadi ku kashibo ka kunundu mu nshibo yaaye ya bufumu, batala paashi bamono mukashi umune ebuwa. Eshina dyaaye nyi Betsabee na mulume aaye nyi Uriya.

Daavide bakuminyine Betsabee ngofu aye nkumwitanyisha ku nshibo yaaye. Mulume aaye mwende ku ngoshi. Daavide nkulaala naaye akupu aye nkumona shi bapete eyimi. Daavide baadi n’eshimba kwiyilu aye nkutuma eyi bwashi Yoabe mukata a basalayi atuule Uriya ku mulongo wa kumpala mu ngoshi bwashi afwile kwakwa. Pabaafu Uriya, Daavide bayibakila Betsabee.

Yehowa bafiitshila Daavide munda ngofu. Aye nkutuma mufubi aaye Natane bwa kumulesha bubi bwaye. Tala Natane kwete kwisamba na Daavide. Daavide benyongola bikata mwanda wa bibaadi mukite, na Yehowa tamumwipee nya. Kadi Yehowa bamba shi: ‘Bu bibokitshi ino myanda ibubi, okyebe kupeta nkalakasho mu nshibo yoobe.’ Daavide bapetele nkalakasho ikile bungi!

Lwa kumpala, mwana ababatandile kwi Betsabee bafwile. Akupu, Amenone mwana mulume a kumpala a Daavide bakwatshile Tamare nkashy’a naaye alaala naaye pa bukopo. Absalome mwana mulume a Daavide bafiitshile munda ngofu pabitale wawa mwanda aye nkwipaa Amenone. Kunyima kwa mafuku, mwilo ubabangile kufula Absalome na aye nkwituula bu nfumu. Ku nfudiilo, Daavide batshokwele ngoshi kumpala kwa Absalome, na Absalome bafwile. Eyendo, Daavide bapetele nkalakasho ibungi.

Munkatshi mwa aa mafuku, Betsabee batandile mwana mulume abetanyina bu Salomone. Pabaadi Daavide taadi mununu na kwete kukumba, mwana aaye mulume Adonyase batompele kwituula ku bufumu. Anka paapa Daavide balungula tshiite-mwakwidi Sadoke shi eele Salomone mwimu ku mutwe bwa kulesha shi Salomone nyi akyebe kwikala nfumu. Binobino kunyima kwa mafuku Daavide bafwile na bipwa 70. Baadi mumunane munda mwa bipwa 40, kadi binobino Salomone nyi taadi nfumu mu Isaleele.

2 Samwele 11:1-27; 12:1-18; 1 Banfumu 1:1-48.