Mwanda wa 65

Bufumu bubeabuula

OUKU bwakinyi uno muntu kwete kusaana kilamba kyaaye tupesetupese? Yehowa ekalanga mumulungule bwashi akite byabya. Uno muntu nyi Ahiya, mutemuki a Efile Mukulu. Ouku shi mutemuki muntu kinyi? Nyi muntu abalungulaa kwi Efile Mukulu myanda ayikyebe kukitshika mu mafuku e kumpala.

Pano, Ahiya kwete kwisamba na Yeroboame. Yeroboame nyi mulume ababadi batuule kwi Salomone bwa kukunkusha midimo yaaye ya kwibaka. Pabafumankana na Yeroboame muno mwishinda, Ahiya bakitshi kino kintu kya kukanya. Bafuulu kilamba kyaaye kipya kyekalanga mufwale na bekisaana mu tupese 12. Balungula Yeroboame shi: ‘Ata tupese 10.’ Ouku bwakinyi Ahiya baapa Yeroboame tupese 10?

Ahiya bapatuula shi Yehowa akyebe kunyenga Salomone bufumu. Bamba shi Yehowa akyebe kupa Yeroboame bisamba 10. Byabya abilesha shi nkapenda bisamba bibidi nyi abishala mu bufumu bwa Roboame, mwana a Salomone.

Pabapusha Salomone bibaadi Ahiya mulungule Yeroboame, bafitshi munda ngofu. Bakimbi mushindo wa kwipa Yeroboame. Kadi Yeroboame basuuku mu Ejiipitu. Kunyima kwa mafuku, Salomone bafwile. Baadi mukite bipwa 40 ku bufumu, kadi binobino Roboame mwan’aye baata bufumu. Pabaadi kwakwa ku Ejiipitu, Yeroboame bapusha shi Salomone baafu, ndjo baluka mu Isaleele.

Roboame tabaadi nfumu ebuwa nya. Baadi akyengyesha bantu kukila na nshaye Salomone. Yeroboame na bangi bantu bakata abaayile kwi Nfumu Roboame mu kumuteka bwashi ashaale kalolo na mwilo. Kadi Roboame ta mupushe nya. Dingi, babangile kukyengyesha bantu kukila kumpala. Ndjo bantu nkutuula Yeroboame bu nfumu a bisamba 10, kadi bisamba bibidi, kya Benyamina na Yuuda, bibashadile mu bufumu bwa Roboame.

Yeroboame tabaadi akumina shi mwilo wende ku Yeelusaleme mu kulangwila mu ntempelo a Yehowa nya. Byabya aye nkukitshisha ma nkishi abidi a twana twa ngombe twa oòlò bwashi bantu ba byabya bisamba 10 bealangwile. Kunyima kwa mafuku apela, eumbo dibaadi diule na buntomboshi na bukitekite.

Mu bufumu bwa bisamba bibidi mubatwele malwa. Kumpala kwa nfumu Roboame kulombasha bipwa bitano ku bufumu, nfumu a mu Ejiipitu bafikile mu kulwa na Yeelusaleme. Baatshile bintu bibungi bya muulo bibaadi mu ntempelo a Yehowa. Byabya ntempelo tabaadi mushaale mafuku ebungi bu bibaadi nsaa ibabadi bamwibakye nya.

1 Banfumu 11:26-43; 12:1-33; 14:21-31.