Mwanda wa 66

Yezabele nfumu mukashi ebubi

KUNYIMA kwa lufu lwa Nfumu Yeroboame, banfumu booso abamunyine bisamba 10 bya kunundu bya Isaleele abaadi bubi. Nfumu Akabe baadi bubi kukila booso. Ouku shi bwakinyi? Kya kumpala mpa mwanda wa mukashi aaye Yezabele, nfumu mukashi ebubi.

Yezabele tabaadi mwina Isaleele nya. Baadi mwana a nfumu a mu Sidone. Baadi alangwila Baale, efile a madimi; na baadi mutakule Akabe na bangi beena Isaleele bebungi mu kulangwila Baale. Yezabele baadi mushikwe Yehowa na bayipayiishe batemuki bebungi. Bangi abaadi abakafwama mu mbwebwe bwa kusuuka lufu. Su Yezabele e na lukalo na kintu kampanda, mmukumbeene mpa na kwipa muntu bwa kwikipeta.

Dingi efuku, Nfumu Akabe baadi mwinyongole ngofu. Ndjo Yezabele nkumwipusha shi: ‘Bwakinyi lelo we mushidiky’eshimba?’

Akabe balulwile shi: ‘Mwanda wa bibangamba Nabote. Nekalanga na lukalo lwa kuula efuba dyaaye dya nfinyo. Kadi ekeele mundungule shi ntshi mukumbeene kwidipeta nya.’

Yezabele bambile shi: ‘Twekalakashanga. Naami akup’efuba dya Nabote.’

Paapa Yezabele bafundile mikanda kwi bakulu na kwi bakata babaadi mu lupata lwa Nabote. Bebalungwile shi: ‘Tulayi bantu ba bisumanga mumpala mwaye bwa badya kumutopeka shi aye musabuule Efile Mukulu na nfumu. Akupu numutuushe mu lupata numwase mabwe afwe.’

Pabapushile shi Nabote baafu, Yezabele balungwile Akabe shi: ‘Binobino ebwe waate efuba dya Nabote.’ Tomono shi bibaadi abitungu kunyoka Yezabele pa mwanda wa kyakya kibeshi kibakitshine su?

Byabya, kunyima kwa mafuku, Yehowa batumine Yeku bwa kumunyoka. Pabapushile Yezabele shi Yeku kwete kufika, baadi mwipente bwa kumweka bu mukashi ebuwa. Kadi, pabafikile Yeku na amona Yezabele mwididishi, bayitanyine bantu abaadi ku nshibo ya nfumu shi: ‘Mweleyi paashi!’ Baba bantu abamuponeshe bu byomono mu kifwatulo. Baponene aye nkufwa. Bino nyi bibaadi nfudiilo a Yezabele, nfumu mukashi ebubi.

1 Banfumu 16:29-33; 18:1-4; 21:1-16; 2 Banfumu 9:30-37.