Efile Mukulu bakwasha Nfumu Ezekyase — Watchtower MIKANDA I MU INTERNETE

Mwanda wa 72

Efile Mukulu bakwasha Nfumu Ezekyase

OUKU bwakinyi uno muntu kwete kwela nteko kwi Yehowa? Bwakinyi batuulu ino mikanda paashi kumpala kwa kilambwilo kya Yehowa? Uno muntu nyi Ezekyase. Nyi nfumu a bisamba bibidi bya Isaleele a kuushi. Na dingi bapete lukalakasho. Bwakinyi?

Mwanda basalayi ba beena Aasiriya abapu kubutula bisamba 10 bya beena Isaleele a kunundu. Yehowa baadi mulekye bwashi bebabutule mwanda bantu booso abaadi abakitshi myanda ibubi. Na binobino beena Aasiriya abafiki mu kulwa na bufumu bwa bisamba bibidi.

Nfumu a mu Aasiriya bakatuka mu kutumina Nfumu Ezekyase mikanda. Ino ndjo inyi mikanda yabadi batuule kwi Ezekyase kumpala kw’Efile Mukulu. Mu ino mikanda, nfumu a mu Aasiriya kwete kusenga Yehowa na alungula Ezekyase bwadya kwilambula kwadi. Nyi bwakinyi omono Ezekyase kwete kuteka shi: ‘Yehowa, etupaashe ku maasa a nfumu a mu Aasiriya. Byabya maumbo ooso aukye shi bupenka boobe obe Yehowa we Efile Mukulu.’ Yehowa akyebe kupushisha Ezekyase su?

Ezekyase nyi nfumu ebuwa. Te bu ba nfumu bebubi ba mu bisamba 10 bya Isaleele nya, sunga bu nshaaye Akaaze baadi nfumu ebubi. Ezekyase baadi mukokyele kalolo ku miiya yooso ya Yehowa. Byabya, kunyima kwa kwela luteko, Yehowa balungwile mutemuki Yeeshaya bwashi amutumine mukyendi shi: ‘Nfumu a Aasiriya tatwele mu lupata lwa Yeelusaleme nya. Musalayi su ngumune tesesela pepi nalo nya. Tabemwasa mikyetu.’

Tala kifwatulo ki ku dino dingi esaki. Ouku bano booso basalayi bafwe su? Nyi mbeena Aasiriya. Yehowa batumine mwikeyilu, aye nkwipa basalayi ba beena Aasiriya 185 000 mu bufuku bumune. Ndjo nfumu a beena Aasiriya nkusuuka nkwaluka kwaye.

Bufumu bwa bisamba bibibi bubaadi bupashibwe, na mwilo ubashalele mu butaale munda mwa mafuku. Kadi kunyima kwa lufu lwa Ezekyase, Manasee mwan’aye mulume bamupyanyine ku bufumu. Manasee na Aamone mwana aye mulume, abaadi banfumu bebubi. Binobino eumbo dibaulu dingi na buntomboshi na bukitekite. Pababadi bayipe Nfumu Aamone kwi bafubi baaye, mwana aye mulume Yosyase bafikile bu nfumu a bisamba bibidi.

2 Banfumu 18:1-36; 19:1-37; 21:1-25.