Mwanda wa 76

Ababutula Yeelusaleme

KUBAPU kukila bipwa 10 kubanga pababadi batwale beena Isaleele basha binangu ku Babilone kwi Nabukodonosore. Binobino tala akikitshika! Abashiiki Yeelusaleme. Na dingi beena Isaleele bashaale na muwa abebatwala mu bupika mu Babilone.

Banda kutenkyesha, bino nyi bibaadi batemuki ba Yehowa badimushe bantu shi abikakitshika su mwilo ta ngushintuule bikitshino byabo. Kadi beena Isaleele tababaadi bapushiishe batemuki nya. Abatungunukile na kulangwila b’efile ba madimi pamutwe pa kulangwila Yehowa. Nyi bwakinyi be na kya kunyokibwa. Atwibiuku mwanda Ezekyele, mutemuki a Efile Mukulu etulungula pabitale myanda ibubi ibaadi ayikitshi beena Isaleele.

Ouku Ezekyele su? Nyi ngumune a ku bansongwalume bababadi batwale mu Babilone kwi Nfumu Nabukodonosore bipwa 10 kumpala kwa kabutu ka Yeelusaleme. Danyele na benaye basatu, Shadrake, Meshake na Abede-Nego, abayile nabo mu Babilone wawa musango.

Pabaadi Ezekyele ki mu Babilone, Yehowa bamulesheshe myanda ibubi ayikitshika mu ntempelo mu Yeelusaleme. Yehowa bamulesheshe kipaso. Ezekyele baadi ki mu Babilone, kadi Yehowa bamulesheshe byooso bibaadi abikitshika mu ntempelo. Bibalwishishe eshimba dya Ezekyele!

Yehowa balungwile Ezekyele shi: ‘Tala myanda ibutete ikwete kukita bantu muno mu ntempelo. Tala mushindo wi bimano biwule na bifwatulo bya manyoka na ingi nyema. Na dingi tala beena Isaleele bakwete kwibilangwila!’ Ezekyele bamwene bino bintu, aye nkufunda byooso bibaadi abikitshika.

Yehowa ayipusha Ezekyele shi: ‘Bomono akikitshi bakulu ba mu Isaleele mu mufito su?’ Ky’eyendo baadi mukumbeene kwibimona. Kubaadi bantu 70 babaadi abalangwila b’efile ba madimi. Abaadi abamba shi: ‘Yehowa takwete kwitumona nya. Mmupwe kusumbushena eumbo.’

Paapa Yehowa nkulesha Ezekyele bangi bakashi ku kibelo kya ntempelo kitadiile kunundu. Abaadi bashaale abalangwila Tamuze, efile a madimi. Na dingi tala bano balume be ku kibelo kya ntempelo! Be pepi na 25. Ezekyele baadi mwibamone. Bakwete kukunama batadiile kutunduka nguba abalangwila nguba!

Yehowa nkwamba shi: ‘Bano bantu ta bakwete kunnemeka nya. Tabakwete penda kukita bubi nya kadi bakwete kwibukita mpa na mu ntempelo ande!’ Ndjo Yehowa nkulaa shi: ‘Nebanyoko na nsungu ikata. Nayikala shii na lusa pabakabutulwa.’

Kunyima kwa bipwa penda bisatu aye Yehowa bapu kulesha Ezekyele bino bintu, beena Isaleele abatombokyele Nfumu Nabukodonosore. Ndjo aye nkwenda mu kulwa nabo. Kunyima kwa kipwa kimune na ndambo beena Babilone abaadi babuule bimano bya Yeelusaleme abo nkushiika lupata looso kaalo. Bantu bebungi abaadi bebayipe bangi bebatwala mu bupika mu Babilone.

Bwakinyi Yehowa baadi mutadiile kano kabutu kakata bino kafwile beena Isaleele? Mwanda, tababaadi bapushishe Yehowa nya, na dingi tababaadi bakokyele ku miiya yaaye. Uno mwanda aulesha shi bibuwa twikale nsaa yooso atukitshi akyamb’Efile Mukulu.

Ku mbangilo abalekyele bantu bapeela bwa kushaala mu Isaleele. Nfumu Nabukodonosore batudile mwina Yunda abetanyinaa bu Gedalyau bwa kukunkusha bano bantu. Kadi bangi beena Isaleele abayipayile Gedalyau. Binobino bantu abaadi abatshinyi shi beena Babilone abakyebe kufika mu kwibabutula booso mwanda wa byabya bibabakitshine. Abo kwata Yeelemiya pabukopo nkwenda naaye mu Ejiipitu.

Byabya, eumbo dya Isaleele dibashadile bisumanga, kushi bantu. Munda mwa bipwa 70 takwi muntu su ngumune baadi mushaale mwanka. Dibashadile bisumanga. Kadi Yehowa baadi mulee shi akyebe kwalusha mwilo waaye kunyima kwa bipwa 70. Kumpala kwa byabya, nkinyi kibaadi kikitshikile mwilo w’Efile Mukulu mwiumbo dya Babilone mubabadi bebatwale? Tubande kutala.

2 Banfumu 25:1-26; Yeelemiya 29:10; Ezekyele 1:1-3; 8:1-18.