Mwanda wa 90
Yesu na mwana mukashi mwina Samariya
YESU bayimana bwa kwikisha pa bwina bwa mema mu Samariya. Balongi baaye babende mu lupata mu kuwula bya kudya. Mwana mukashi kwete kwisamba na Yesu, bafiki mu kutapa ndambo ya mema. Ba mulungula shi: ‘Mpe naamu mema a kutoma.’
Bino bibakanyisha uno mukashi ngofu. Ouku bwakinyi bakanya? Mwanda Yesu mwina Yuda, kadi aye mmwina Samariya. Beena Yuda bebungi tabepushenaa na beena Samariya. Tabakuminaa su nkwisamba nabo nya! Kadi Yesu mufule bantu booso. Aye nkumulungula shi: ‘Su bodya kuuka shi nnanyi akutekye mema, nnoobe badya kumuteka bwashi akupe mema a muwa.’
Yawa mukashi bambile shi: ‘Mwanana, twe na sunga mbeketshi aku naamu bwina bwi bula bukile. Byabya aa mema a muwa weapetela kunyi?’
Yesu bamwalulwile shi: ‘Su botomo ano mema okapusha dimo nyoota. Anka atomo mema ammupa aamupa muwa wa looso.’
Mukashi bakwile shi: ‘Mwanana, mpe naamu aa mema! Bwashi ntshikalanga dimo na nyoota. Na bwashi ntshikalanga dimo na kya kufika pano mu kutapa mema.’
Mwana mukashi baadi mupwandikishe shi Yesu kwete kwakula pabitale mema a binyibinyi. Aku namu kwete kwakula pabitale bya binyibinyi by’Efile Mukulu na bufumu bwaye. Byabya bya binyibinyi bii bu mema aapa bantu muwa. Mbilombeene kupa bantu muwa wa looso.
Binobino Yesu balungula mukashi shi: ‘Nda okeetanyine mulume oobe ofikye naaye pano.’
Mukashi balulwile shi: ‘Ntshii na mulume mi.’
Yesu bamulungwile shi: ‘Bwakula bya binyibinyi. Kadi boodi na balume bataano, na mulume oodi naaye binobino ta mmulume oobe nya.’
Mukashi babangile kukanya, mwanda ino myanda yooso ibaadi y’eyendo. Yesu baadi muukye yanka naminyi? Mwanda Yesu nnaaye baadi Mulayibwe, na Efile Mukulu ndjo baadi mumulungule ino myanda yooso. Mu kapindji kapeela, balongi ba Yesu babalukiila, na bakwete kukanya mwanda Yesu kwete kwisamba na mukashi mwina Samariya.
Bino byooso abitulongyesha kinyi? Abitulesha shi Yesu e bibuwa na bantu ba makoba ooso. Atwe naamu abitungu tulonde kileshesho kyaaye. Tabitungu kupwandikisha shi bangi bantu be bubi penda mwanda w’ekoba dyabo. Yesu akumina shi bantu booso bawukye bya binyibinyi abipeya bantu muwa wa looso. Abitungu tukwashe bantu bwashi bawukye bya binyibinyi.