Mwanda wa 94

Mufule baana bakinga

TALA Yesu pano, maboko aaye ngakwate ka nsongwalume. We mukumbeene kuuka shi Yesu mufule baana binyibinyi. Bana balume bakwete kutala mbatumibwa baaye. Yesu kwete kwibalungula kinyi? Tubande kutala.

Yesu na balongi baaye babakatuka mu kwalukiila ku lwendo lwi bula. Munkatshi mw’eshinda, batumibwa abekalanga abeyeleshena mpaka. Ndjo pababaluka, Yesu bebepusha shi: ‘Mpa mwanda kinyi panwelanga mpaka mwishinda?’ Yesu baadi mupwe kuuka binyibinyi kibabadi abesamba. Kadi bebayipusha bwa kutala su batumibwa abamulondela.

Batumibwa tabakumina kumwalula, mwanda mwishinda abekalanga abeele mpaka bwa kuuka su nnanyi a kwabadi mukile booso. Bangi batumibwa be na lukalo lwa kwikala na kinemo kukila bangi. Mushindo kinyi awukyebe Yesu kwibalungula shi tabibuwa kukimba kinemo kikile?

Bayitamina ka nsongwalume, na bekayimika kumpala kwabo. Akupu balungula balongi baaye shi: ‘Eyendo, nenushikwila’shi, su taanwaluluka, na su taanufiki bu uno mwana mukinga tanutwele mu bufumu bwa mwiyilu. Byabya yawa epeelesha bu uno mwana ndjo mukile bukata mu bufumu bwa mwiyilu.’ Ouku bwakinyi Yesu bakwile byabya?

Oolo, baana bakinga tabakimbaa kwikala na kinemo kikile bangi bantu nya. Byabya, abitungu batumibwa bekale bu baana bakinga tabekalanga abekakena pabitale kwikala na kinemo kikile beena’bo.

Kwi ingi nsaa dingi ibaadi Yesu muleshe shi mufule baana bakinga. Kunyima kwa myeshi ipela bangi bantu babatwadile baana bakinga kwi Yesu. Batumibwa babatompele kwibabinga. Kadi Yesu balungwile batumibwa shi: ‘Lekaayi baana bafikye kwandi, tanwibakandikanga, mwanda bufumu bw’Efile Mukulu mbwa bee byabadi.’ Ndjo Yesu nkusemuna baana mu maboko aaye, na nkwibeelela mwabi. Tabibuwa kuuka shi Yesu mufule baana bakinga su?

Mateo 18:1-4; 19:13-15; Maako 9:33-37; 10:13-16.